دہلی اور لاہور دنیا کے سب سے آلودہ شہر، ماہرین نے صحت ایمرجنسی سے خبردار کر دیا

دہلی اور لاہور میں فضائی آلودگی خطرناک حدوں کو چھو چکی ہے، جس نے ماحولیاتی مسئلے کو اب ایک سنگین عوامی صحت کے بحران میں بدل دیا ہے۔ ماہرین کا کہنا ہے کہ اگر فوری احتیاط، آگاہی اور دیرپا پالیسیاں نہ اپنائی گئیں تو ان شہروں میں سانس لینا مزید دشوار ہو جائے گا۔

بھارت کے دارالحکومت دہلی میں دیوالی کے موقع پر آتش بازی کے بعد فضائی آلودگی دنیا میں سب سے زیادہ ریکارڈ کی گئی، جبکہ پاکستان کا لاہور دوسرے نمبر پر رہا۔ رپورٹوں کے مطابق دہلی کی فضا میں آلودگی کی سطح عالمی ادارۂ صحت (ڈبلیو ایچ او) کے مقررہ معیار سے انسٹھ گنا زیادہ جا پہنچی ہے۔

یہ آلودہ ہوا سرحد پار لاہور تک بھی پہنچ رہی ہے، جہاں سموگ اور دھند میں اضافہ شہریوں کے لیے تشویش کا باعث بن گیا ہے۔

دہلی کے میکس اسپتال شالیمار باغ کے ماہر امراضِ تنفس ڈاکٹر اندر موہن کا کہنا ہے کہ فضا میں موجود پی۔ایم۔ٹو پوائنٹ فائیو (PM2.5) اور پی۔ایم۔ٹین (PM10) ذرات پھیپھڑوں اور سانس کی نالیوں کو نقصان پہنچاتے ہیں، جس سے دمہ، برونکائٹس، نزلہ، زکام، کھانسی، الرجی اور گلے کی خراش جیسی شکایات بڑھ جاتی ہیں۔

انہوں نے خبردار کیا کہ جن افراد کو پہلے سے سانس یا دل کے امراض لاحق ہیں، ان کے لیے یہ فضا نہایت خطرناک ہے۔ اگر کسی مریض کو سانس لینے میں دشواری، سینے میں بھاری پن، مسلسل کھانسی، گلے یا آنکھوں میں جلن محسوس ہو یا انہیلر کے استعمال میں اضافہ ہو جائے تو فوراً ڈاکٹر سے رجوع کرنا چاہیے۔

ماہرین کی احتیاطی تجاویز

گھر میں ہوا صاف کرنے والا آلہ (ایئر پیوریفائر) چلائیں اور کھڑکیاں بند رکھیں

باہر ورزش کے بجائے گھر کے اندر ورزش کریں

زیادہ پانی پئیں تاکہ جسم سے زہریلے مادے خارج ہوں

ہلدی، شہد، ادرک اور وٹامن سی سے بھرپور غذا استعمال کریں

بھاپ لیں، نیم گرم نمک والے پانی سے غرارے کریں اور شہد و ادرک کی چائے پئیں

مستقل حل کی ضرورت

ماہرین کے مطابق فضائی آلودگی پر قابو پانے کے لیے وقتی اقدامات کافی نہیں۔ زرعی باقیات جلانے پر مؤثر پابندی، صاف توانائی کے ذرائع کا فروغ، صنعتی فضلے کی نگرانی، اور عوامی آگاہی میں اضافہ جیسے پائیدار اقدامات ناگزیر ہیں۔

دیوالی کی آتش بازی نے ایک بار پھر واضح کر دیا ہے کہ ماحولیاتی مسائل سرحدوں کے پابند نہیں ہوتے — دہلی کی آلودگی اب لاہور کی فضا کے لیے بھی خطرہ بن چکی ہے۔