دھرنا جاری رہے گا،جوکرنا ہے کر لیں

مجلس وحدت مسلمین پاکستان کے مرکزی رہنما علامہ سید حسن ظفر نقوی نے کراچی میں پولیس کی جانب سے جاری احتجاجی دھرنا ختم کرنے کے حوالے سے ہنگامی پریس کانفرنس کے دوران واضح کیا ہے کہ ‘یہ دھرنا جاری رہے گا، چاہے کچھ بھی ہو جائے’۔ ان جگہوں پر جہاں دھرنے ختم ہو گئے۔ اب پھر دھرنے ہوں گے۔

عباس ٹاؤن میں دھرنے کے دوران پولیس نے شیلنگ اور ہوائی فائرنگ کی جس سے علاقہ میدان جنگ میں تبدیل ہو گیا۔ معلومات کے مطابق پولیس نے ڈیڑھ گھنٹے میں 5 مقامات پر دھرنے ختم کر دیے تاہم پھر 4 مقامات پر دھرنے شروع ہو گئے۔

اس حوالے سے علامہ حسن ظفر نقوی نےپریس کانفرنس کے دوران کہا کہ جب سندھ حکومت کے نمائندوں نے ہمدردی اور یکجہتی کا اظہار کیا تو ہمیں نہیں معلوم کہ انہوں نے کیا منصوبہ بنایا ہے۔

انہوں نے کہا کہ جہاں بھی کوئی مسئلہ تھا ہم نے اپنے بندے بھیجے تھے کہ وہ مسئلہ حل کریں لیکن صبح سویرے ہمارے لوگوں پر سندھ پولیس نے چھاپہ مارا اور خواتین اور بچوں کو زدوکوب کیا گیا۔

حسن ظفر نقوی نے کہا کہ یہ ظلم تاریخ میں لکھا جائے گا، میں آج کہتا ہوں کہ یہ دھرنا جاری رہے گا، جو کرنا ہے کرلو، اگر وہ ہمیں دہشت گرد کہہ کر ہم پر ظلم کریں گے تو ہم دھرنا جاری رکھیں گے، جب تک پارا چنار میں دھرنا جاری رہے گا ہم جاری رکھیں گے۔

مجلس وحدت مسلمین پاکستان کے مرکزی رہنما نے کہا کہ آج صبح ہمارے ساتھ جو ہوا وہ انتہائی غلط ہے۔ میں سندھ اور پاکستان کے تمام مومنین سے کہتا ہوں کہ وہ گھروں سے باہر نکلیں۔