دبئی میں دنیا کی سب سے مہنگی کافی پیش — ایک کپ کی قیمت لاکھوں میں

دبئی ایک بار پھر دنیا کی توجہ کا مرکز بن گیا ہے، جہاں ایک کیفے نے ایسی نایاب کافی متعارف کرائی ہے جس کی قیمت سن کر سب حیران رہ گئے۔

یہ منفرد کافی 3600 درہم (تقریباً 2 لاکھ 75 ہزار پاکستانی روپے) فی کپ میں دستیاب ہے، جسے دبئی کے جولیتھ کیفے میں پیش کیا جا رہا ہے۔

اس قیمتی مشروب کی تیاری میں پاناما کے آتش فشانی علاقوں میں اگنے والے Geisha Nido 7 بیج استعمال کیے گئے ہیں، جنہیں دنیا کی سب سے نایاب اور اعلیٰ معیار کی کافی میں شمار کیا جاتا ہے۔ اس قسم کی پیداوار ہر سال انتہائی محدود مقدار میں ہوتی ہے، اسی لیے یہ کافی عالمی سطح پر خاص اہمیت رکھتی ہے۔

جولیتھ کیفے کے مطابق، اس منفرد کافی کے صرف 400 کپ تیار کیے جائیں گے۔ کیفے نے سال 2025 کے آغاز میں اس نایاب بیج کی 20 کلوگرام مقدار 22 لاکھ درہم میں نیلامی کے ذریعے حاصل کی تھی۔

کیفے کے شریک بانی سرکان ساگسوز نے بتایا کہ اس خاص کافی کا ایک کپ دبئی کے حکمران شیخ محمد بن راشد المکتوم کے لیے مختص ہے، جبکہ صرف چند خوش نصیب افراد ہی اس کا ذائقہ چکھ سکیں گے۔

ان کے مطابق، یہ کوئی مارکیٹنگ حکمتِ عملی نہیں بلکہ واقعی ایک غیر معمولی کافی ہے جس کا ذائقہ صرف چند لوگ ہی دنیا بھر میں محسوس کر سکتے ہیں۔ اس کے ذائقے میں چینبلی، مالٹے اور دیگر پھلوں کی خوشبو شامل ہوتی ہے۔

اس سے قبل دبئی ہی میں دنیا کی سب سے مہنگی کافی کا ریکارڈ 2500 درہم فی کپ کے ساتھ موجود تھا، لیکن جولیتھ کیفے کی یہ نئی پیشکش اس ریکارڈ کو پیچھے چھوڑ چکی ہے۔