تین ماہ میں 50 کلو وزن کم کرنے پر پورشے پینامیرا انعامی چیلنج

چین کے صوبہ شینڈونگ کے شہر بنژو میں ایک مقامی جم نے دلچسپ اور حیران کن فٹنس چیلنج متعارف کرایا ہے۔ جم نے اعلان کیا ہے کہ جو بھی شخص تین ماہ کے اندر 50 کلوگرام وزن کم کرنے میں کامیاب ہوگا، اسے انعام کے طور پر پورشے پینامیرا دی جائے گی۔

یہ خبر سوشل میڈیا پر تیزی سے وائرل ہو رہی ہے، جہاں صارفین اسے بیک وقت حوصلہ افزا اور انتہائی مشکل چیلنج قرار دے رہے ہیں۔

جم کے کوچ وانگ نے چینی میڈیا کو بتایا کہ یہ کوئی مارکیٹنگ حربہ نہیں بلکہ حقیقی فٹنس مقابلہ ہے۔ انہوں نے کہا کہ رجسٹریشن صرف 30 افراد کے لیے کھلی ہے اور ابھی تک 7 یا 8 افراد شامل ہو چکے ہیں۔

چیلنج میں حصہ لینے کے لیے شرکاء کو 10,000 یوآن (تقریباً 4 لاکھ پاکستانی روپے) بطور رجسٹریشن فیس ادا کرنا ہوگی، جس میں رہائش اور کھانے کے انتظامات بھی شامل ہیں۔ تاہم، جم نے ابھی تک تربیتی منصوبے، غذائی چارٹ یا وزن کی پیمائش کے طریقہ کار کی تفصیلات ظاہر نہیں کی ہیں۔

انعام میں دی جانے والی پورشے پینامیرا استعمال شدہ 2020 ماڈل ہے اور جم کے بانی کی ذاتی ملکیت ہے۔ چین میں نئی پینامیرا کی قیمت تقریباً 1.1 ملین یوآن (تقریباً 4 کروڑ 34 لاکھ پاکستانی روپے) ہے۔ یہ لگژری اسپورٹس سیڈان طاقت، رفتار اور آرام کا امتزاج پیش کرتی ہے اور چند سیکنڈ میں 0 سے 100 کلومیٹر فی گھنٹہ کی رفتار حاصل کر سکتی ہے۔

پاکستان میں اس ماڈل کی قیمت 7 کروڑ سے 16.8 کروڑ روپے کے درمیان ہے، جو ماڈل اور حالت کے لحاظ سے مختلف ہوتی ہے۔ پورشے پینامیرا اپنی شاندار ڈیزائن، پریمیم انٹیریئر اور جدید سیفٹی ٹیکنالوجی کی وجہ سے دنیا بھر میں مقبول ہے۔

اگرچہ چیلنج کے نتائج ابھی معلوم نہیں، لیکن اس نے لوگوں میں فٹنس کے حوالے سے تجسس اور جوش پیدا کر دیا ہے، کیونکہ تین ماہ میں 50 کلو وزن کم کرنا ایک بہت بڑا امتحان ہے۔