تربیلا ڈیم کی مٹی میں 636 ارب ڈالر مالیت کا سونا ہونے کا انکشاف

کراچی — پاکستان کی معیشت کے حوالے سے ایک دلچسپ انکشاف سامنے آیا ہے۔ ایئر کراچی کے چیئرمین اور فیڈریشن آف پاکستان چیمبرز آف کامرس کے سابق نائب صدر حنیف گوہر کے مطابق تربیلا ڈیم کی مٹی میں بھاری مقدار میں سونا موجود ہے، جس کی مالیت کا اندازہ تقریباً 636 ارب ڈالر لگایا گیا ہے۔

کراچی پریس کلب میں میڈیا سے گفتگو کرتے ہوئے حنیف گوہر نے بتایا کہ یہ معلومات باقاعدہ طور پر آرمی چیف کو پیش کی جا چکی ہیں اور اس حوالے سے مثبت ردعمل بھی موصول ہوا ہے۔

ان کے مطابق، غوطہ خوروں کی ایک ٹیم نے تربیلا ڈیم کے اندر سے مٹی کے نمونے حاصل کیے، جنہیں بعد ازاں مختلف لیبارٹریز میں جانچا گیا۔ تجزیے کے نتائج میں مٹی میں سونے کی موجودگی کی تصدیق ہوئی، جس کی مجموعی مالیت کا تخمینہ سینکڑوں ارب ڈالر بتایا جا رہا ہے۔

حنیف گوہر کا کہنا تھا کہ اگر حکومت اجازت دے تو ان کی کمپنی یہ منصوبہ خود شروع کرنے کے لیے تیار ہے۔ انہوں نے یہ بھی بتایا کہ اس سلسلے میں ہالینڈ، ایمسٹرڈم اور کینیڈا کے ماہرین اور سرمایہ کاروں سے ابتدائی بات چیت ہو چکی ہے۔

ان کے مطابق، اگر یہ منصوبہ عملی شکل اختیار کر لے تو اس سے نہ صرف پاکستان کا بیرونی قرضہ ادا کیا جا سکتا ہے بلکہ ملکی معیشت میں غیر معمولی استحکام بھی آ سکتا ہے۔