برطانیہ میں مسلسل تیسرے سال ‘محمد’ نومولود لڑکوں کا مقبول ترین نام

برطانیہ کے سرکاری اعداد و شمار کے مطابق انگلینڈ اور ویلز میں سال 2025 کے دوران نومولود لڑکوں کے لیے ‘محمد’ مسلسل تیسرے سال سب سے زیادہ منتخب کیا جانے والا نام رہا۔

اعداد و شمار کے مطابق تقریباً 6 ہزار بچوں کا نام محمد رکھا گیا، جبکہ نوح دوسرے نمبر پر رہا۔ دونوں نام گزشتہ چند برسوں سے سرفہرست ہیں، تاہم اس سال محمد اور نوح کے درمیان فرق مزید بڑھ گیا۔

لڑکوں کے دیگر مقبول ناموں میں لیو، لوکا، آرتھر، اولیور اور جارج شامل ہیں، جبکہ لڑکیوں میں اولیویا بدستور پہلے نمبر پر رہی۔ اس کے علاوہ للی، امیلیا، آئلا اور فلورنس بھی نمایاں ناموں میں شامل رہے۔

رپورٹ کے مطابق محمد نام کو انگریزی میں مختلف انداز سے لکھا جاتا ہے، جن میں Muhammad، Mohammed اور Mohammad شامل ہیں۔ مختلف ہجے دنیا کے مختلف خطوں اور زبانوں کے تلفظ کی عکاسی کرتے ہیں۔

ماہرین کا کہنا ہے کہ برطانیہ میں مسلم آبادی میں اضافہ، مذہبی وابستگی اور ثقافتی شناخت اس نام کی مسلسل مقبولیت کی اہم وجوہات ہیں۔ سرکاری تخمینوں کے مطابق برطانیہ میں مسلمانوں کی تعداد تقریباً 40 لاکھ ہے، جو ملک کی مجموعی آبادی کا لگ بھگ 6 فیصد بنتی ہے۔

رپورٹ میں یہ بھی بتایا گیا ہے کہ برطانیہ میں بچوں کے ناموں کے انتخاب میں ثقافتی تنوع نمایاں ہو رہا ہے، جہاں مختلف زبانوں اور ثقافتوں سے تعلق رکھنے والے نام بھی مقبولیت حاصل کر رہے ہیں۔