باپ نے پولیس کے سامنے بیٹی کو گولی مار کر قتل کر دیا

ہاٹ لائن نیوز : بھارتی ریاست مدھیہ پردیش کے شہر گوالیار میں باپ نے شادی سے 4 روز قبل پسندکی شادی کی خواہش ظاہر کرنے والی بیٹی کو قتل کر دیا۔

بھارتی میڈیا کے مطابق مقتولہ بیٹی گھر والوں کی پسند کی بجائے اپنی مرضی سے شادی کرنا چاہتی تھی لیکن باپ نے پولیس اور پنچایت کے سامنے 20 سالہ بیٹی کو گولی مار دی۔

اپنی موت سے کچھ دیر قبل لڑکی نے ایک ویڈیو ریکارڈ کر کے سوشل میڈیا پر پوسٹ کی تھی، جس میں اس نے کہا تھا کہ میری زبردستی شادی کرنیکی کوشش کی جا رہی ہے۔

لڑکی نے ویڈیو میں کہا تھا کہ میں وکی نامی لڑکے سے شادی کرنا چاہتی ہوں، شروع میں میرے گھر والوں نے رضامندی ظاہر کی لیکن بعد میں انہوں نے انکار کردیا۔

ویڈیو میں لڑکی نے اپنی جان کو لاحق خطرات کا بھی اظہار کیا تھا اور گھر والوں پر روزانہ تشدد کا الزام لگایا تھا۔

ویڈیو سامنے آنے کے بعد پولیس اور پنچایت کے لوگ معاملہ طے کرنے لڑکی کے گھر پہنچے تھے جہاں باپ نے بیٹی کو گولی مار دی۔

بھارتی میڈیا کے مطابق جاں بحق لڑکی کی شادی 18 جنوری کو طے تھی، واقعے کے بعد پولیس نے ملزم کو گرفتار کرلیا۔