ایران پر نئے حملے کی تیاری؟ ٹرمپ کے اہم فوجی منصوبہ ساز کو عہدے سے ہٹا دیا گیا

امریکی محکمہ دفاع میں اعلیٰ سطح پر ایک اور تبدیلی سامنے آئی ہے، جہاں پینٹاگون کے اہم فوجی منصوبہ ساز لیفٹیننٹ جنرل بریٹ سلویا کو ان کے عہدے سے ہٹا دیا گیا ہے۔ یہ پیش رفت ایسے وقت میں ہوئی ہے جب امریکی صدر ڈونلڈ ٹرمپ ایران کے خلاف ممکنہ نئی فوجی کارروائی کے آپشنز پر غور کر رہے ہیں۔

خبر رساں ادارے ایسوسی ایٹڈ پریس کے مطابق امریکی محکمہ دفاع کے ایک عہدیدار نے سلویا کو عہدے سے ہٹائے جانے کی تصدیق کی۔ تاہم اس فیصلے کی وجوہات سامنے نہیں آئیں اور ان کے متبادل کا اعلان بھی نہیں کیا گیا۔

بریٹ سلویا جوائنٹ چیفس آف اسٹاف میں حکمت عملی، منصوبہ بندی اور پالیسی کے شعبے کے سربراہ تھے۔ امریکی فوجی نظام میں اس عہدے کو جے فائیو کہا جاتا ہے، جس کی ذمہ داری اہم فوجی منصوبوں کی تیاری اور مختلف اداروں کے درمیان رابطہ کاری ہے۔

سلویا کی برطرفی امریکی وزیر دفاع پیٹ ہیگسیتھ کے دور میں اعلیٰ فوجی قیادت میں ہونے والی تبدیلیوں کا تازہ واقعہ ہے۔ اس سے قبل بھی متعدد سینئر فوجی افسران اپنے عہدے چھوڑ چکے ہیں یا انہیں ریٹائرمنٹ لینا پڑی ہے۔ ان تبدیلیوں کی وجوہات ہر معاملے میں باضابطہ طور پر واضح نہیں کی گئیں۔

دوسری جانب مشرق وسطیٰ میں امریکی فوجی موجودگی بڑھانے کی اطلاعات ہیں۔ امریکی حکام کے مطابق اضافی فوجیوں اور ایک مزید طیارہ بردار جنگی جہاز کی تعیناتی بھی جاری ہے، جس سے خطے میں کشیدگی کے خدشات بڑھ گئے ہیں۔

رپورٹس کے مطابق واشنگٹن نے علاقائی اتحادیوں کو ممکنہ فوجی کارروائی اور ایران کی جوابی کارروائی کے امکانات سے متعلق بھی آگاہ کیا ہے۔ تاہم صدر ٹرمپ کی جانب سے ایران پر نئے حملوں کا حتمی فیصلہ کیے جانے کی تصدیق نہیں ہوئی۔

بریٹ سلویا اس سے قبل امریکی فوج کے 101ویں ایئربورن ڈویژن کی کمان بھی سنبھال چکے ہیں۔ ان کی برطرفی ایسے مرحلے پر ہوئی ہے جب امریکی فوجی قیادت میں تنظیمی تبدیلیوں اور اعلیٰ افسران کی تعداد کم کرنے کے منصوبے پر بھی کام جاری ہے۔