انسٹا گرام کی پوسٹس میں کلک ایبل لنکس کے لیے نئے فیچر کی آزمائش

انسٹا گرام نے محدود صارفین کے لیے ایک نئے فیچر کی آزمائش شروع کر دی ہے، جس کے تحت پوسٹس کے کیپشنز میں کلک ایبل لنکس شامل کیے جا سکتے ہیں۔
اس وقت تک انسٹا گرام میں صارفین کسی بھی پوسٹ کے کیپشن میں بیرونی ویب سائٹس کے لنکس شامل نہیں کر سکتے تھے، اور یہ خصوصیت صارفین کی کافی پرانی مانگ رہی تھی تاکہ وہ اپنی ویب سائٹس پر ٹریفک بڑھا سکیں۔
رپورٹس کے مطابق، آزمائش کے دوران ہر صارف ایک ماہ میں زیادہ سے زیادہ 10 لنکس اپنی پوسٹس میں شامل کر سکتا ہے۔
میٹا، جو انسٹا گرام کی مالک کمپنی ہے، نے اس بات کی تصدیق کی کہ کیپشن لنکس کی آزمائش جاری ہے اور یہ فیچر فی الحال صرف میٹا ویریفائیڈ سبسکرائبرز کے لیے دستیاب ہے۔ تاہم، یہ واضح نہیں کیا گیا کہ یہ فیچر کب تک عام صارفین کے لیے بھی متعارف کرایا جائے گا۔
یہ پہلا موقع ہے کہ انسٹا گرام میں پوسٹس کے کیپشن میں کلک ایبل لنکس شامل کرنے کی اجازت دی جا رہی ہے، جو اس فوٹو شیئرنگ پلیٹ فارم میں صارفین کے لیے بڑی سہولت ثابت ہو سکتی ہے۔