ارجن اور گیبریئیلا کی محبت کا نیا مرحلہ: اداکار نے منگنی کا اعلان کر دیا

بھارتی فلم انڈسٹری کے معروف اداکار ارجن رامپال نے اپنی دیرینہ ساتھی گیبریئیلا ڈیمیٹریاڈس سے منگنی کی تصدیق کر دی ہے۔ دونوں گزشتہ چھ برس سے ایک دوسرے کے ساتھ ہیں۔

ارجن رامپال نے یہ انکشاف حال ہی میں اداکارہ ریا چکرورتی کے شو میں گفتگو کے دوران کیا، جہاں بات چیت کے دوران یہ دلچسپ خبر سامنے آئی۔

انٹرویو میں گیبریئیلا ڈیمیٹریاڈس نے محبت اور والدین بننے کے سفر پر اظہارِ خیال کرتے ہوئے کہا کہ محبت اکثر کچھ شرائط کے ساتھ جڑی ہوتی ہے، تاہم جب انسان والدین بن جاتا ہے تو وہ شرائط ختم ہو جاتی ہیں۔ ان کا کہنا تھا کہ رشتہ صرف ظاہری خوبصورتی کی بنیاد پر نہیں ہونا چاہیے۔

اس پر ارجن رامپال نے مسکراتے ہوئے کہا کہ ابتدا میں وہ گیبریئیلا کی خوبصورتی سے متاثر ہوئے تھے، مگر بعد میں انہیں احساس ہوا کہ ان کی شخصیت میں خوبصورتی کے علاوہ بھی بہت کچھ ہے۔

گفتگو کے دوران جب گیبریئیلا نے بتایا کہ وہ دونوں شادی شدہ نہیں ہیں تو ارجن رامپال نے فوراً وضاحت کرتے ہوئے کہا کہ وہ منگنی کر چکے ہیں، جس پر میزبان ریا چکرورتی بھی حیران رہ گئیں۔

واضح رہے کہ ارجن رامپال اور گیبریئیلا ڈیمیٹریاڈس 2018 سے ایک ساتھ ہیں اور ان کے دو بیٹے بھی ہیں۔