آزاد کشمیر میں دانش اسکولز اور یونیورسٹی کے قیام کا اعلان

مظفرآباد: وزیراعظم شہباز شریف نے کہا ہے کہ مئی 2025 کے دوران ہونے والی جنگ میں افواجِ پاکستان نے بھارت کو ایسا مؤثر جواب دیا جو اس کے لیے ہمیشہ یادگار رہے گا۔
وہ مظفرآباد میں یونیورسٹی آف آزاد کشمیر میں طلبہ و طالبات میں لیپ ٹاپ تقسیم کرنے کی تقریب سے خطاب کر رہے تھے۔ وزیراعظم کا کہنا تھا کہ لیپ ٹاپ محض ایک آلہ نہیں بلکہ نوجوانوں کے مستقبل کے لیے ایک واضح وژن ہے۔ انہوں نے کہا کہ اگر لیپ ٹاپ اسکیم رشوت یا سفارش پر مبنی ہوتی تو آج ملک کے نوجوان ڈاکٹر اور انجینئر نہ بن پاتے۔ ان کے مطابق اب تک ایک بھی لیپ ٹاپ سفارش کی بنیاد پر تقسیم نہیں کیا گیا۔
وزیراعظم نے اعلان کیا کہ آزاد کشمیر میں چار دانش اسکول قائم کرنے کی منظوری دی جا چکی ہے جبکہ آئندہ مرحلے میں دانش یونیورسٹی کے قیام پر بھی کام کیا جائے گا۔
تقریب سے خطاب کرتے ہوئے شہباز شریف نے کہا کہ مئی 2025 کی جنگ میں پاکستان کی مسلح افواج نے دشمن کو بھرپور جواب دیا۔ انہوں نے اس عزم کا اظہار کیا کہ وہ دن دور نہیں جب کشمیر پاکستان کا حصہ بنے گا اور مقبوضہ کشمیر آزادی حاصل کرے گا۔ ان کا کہنا تھا کہ اتحاد، یکجہتی اور سیاسی جدوجہد کے ذریعے کشمیری عوام کو ان کا حق دلایا جائے گا۔