گلستانِ جوہر میں مبینہ منشیات فروش خاتون دو بیٹوں سمیت گرفتار

کراچی کے علاقے گلستانِ جوہر میں پولیس نے کارروائی کرتے ہوئے ایک مبینہ منشیات فروش خاتون کو اس کے دو بیٹوں سمیت حراست میں لے لیا۔ حکام کے مطابق گرفتار خاتون، جسے شیریں عرف شیرینہ کے نام سے جانا جاتا ہے، منشیات کی فروخت کے ایک منظم نیٹ ورک سے وابستہ بتائی جاتی ہے۔

پولیس کا کہنا ہے کہ ابتدائی تحقیقات میں معلوم ہوا ہے کہ ملزمہ اپنے رہائشی فلیٹ سے ہی منشیات فروخت کرتی تھی اور مبینہ طور پر کھڑکی کے ذریعے خریداروں تک ہیروئن پہنچائی جاتی تھی۔ حکام کے مطابق خاتون ہیروئن، چرس اور دیگر منشیات کے کاروبار میں سرگرم رہی ہے۔

پولیس ریکارڈ کے مطابق ملزمہ کے خلاف شہر کے مختلف تھانوں میں متعدد مقدمات درج ہیں اور وہ ماضی میں بھی منشیات فروشی کے الزامات کے تحت گرفتار ہوکر جیل جا چکی ہے۔

تحقیقات سے یہ بھی سامنے آیا ہے کہ خاتون پہلے سہراب گوٹھ کے علاقے میں بھی منشیات کے مبینہ کاروبار سے منسلک رہی۔ پولیس کے مطابق جیل سے رہائی کے بعد اس نے دوبارہ غیر قانونی سرگرمیاں شروع کر دی تھیں۔

حکام کا کہنا ہے کہ ماضی کے ایک مقدمے میں ملزمہ کے قبضے سے ایک ہینڈ گرنیڈ بھی برآمد ہوا تھا، جس کے باعث اس کے خلاف سنگین نوعیت کے مقدمات قائم کیے گئے تھے۔

پولیس نے بتایا کہ گرفتار خاتون اور اس کے دونوں بیٹوں سے مزید پوچھ گچھ جاری ہے، جبکہ اس سے منسلک مبینہ منشیات نیٹ ورک کے حوالے سے مزید معلومات حاصل کی جا رہی ہیں۔