برازیل میں انفلوئنسر کا جعلی اغوا ڈرامہ، شہرت کی خواہش نے گرفتاری تک پہنچا دیا

سوشل میڈیا پر شہرت حاصل کرنے کی دوڑ بعض اوقات انسان کو ایسے خطرناک اقدامات تک لے جاتی ہے جو نہ صرف غیر اخلاقی بلکہ قانونی طور پر جرم بھی ہوتے ہیں۔ ایسا ہی ایک حیران کن واقعہ برازیل میں پیش آیا، جہاں 27 سالہ سوشل میڈیا انفلوئنسر مونیکی فراگا کو اپنے ہی اغوا کا ڈرامہ رچانے کے الزام میں گرفتار کر لیا گیا۔
پولیس کے مطابق، فراگا نے مبینہ طور پر میڈیا کی توجہ حاصل کرنے اور اپنے فالوورز بڑھانے کے لیے یہ منصوبہ بنایا۔ یہ واقعہ اس وقت منظر عام پر آیا تھا جب گزشتہ سال اپریل میں انہوں نے ایک ویڈیو کے ذریعے دعویٰ کیا کہ انہیں اور ان کے شوہر لوکاس کو مسلح افراد نے اغوا کر لیا ہے۔
ویڈیو میں انہوں نے بتایا کہ انہیں جنگل میں لے جا کر کئی گھنٹوں تک قید رکھا گیا اور تشدد کا نشانہ بنایا گیا۔ ان کے مطابق اغوا کاروں نے ایک لاکھ برازیلین رئیس تاوان بھی طلب کیا، جس میں سے کچھ رقم ادا کیے جانے کا دعویٰ بھی کیا گیا۔
تاہم، پولیس کی تحقیقات نے اس کہانی کو مکمل طور پر جھوٹا قرار دیا۔ تفتیشی حکام کا کہنا ہے کہ فراگا اس منصوبے میں براہ راست شامل تھیں اور مبینہ ملزمان کے ساتھ رابطے میں بھی رہیں۔ اس معاملے میں تین دیگر افراد کے ملوث ہونے کا بھی انکشاف ہوا ہے۔
حیران کن طور پر، فراگا کے شوہر لوکاس اس سازش سے مکمل طور پر لاعلم تھے۔ پولیس کے مطابق، ڈرامے کو حقیقی دکھانے کے لیے انہیں واقعی تشدد کا نشانہ بنایا گیا اور ان سے لوٹ مار بھی کی گئی، جس سے وہ خود کو ایک حقیقی جرم کا متاثرہ سمجھتے رہے۔
فراگا کے وکلاء نے عدالت سے درخواست کی ہے کہ ان کے کم عمر بچوں کو مدنظر رکھتے ہوئے انہیں گھر پر نظر بند کیا جائے، تاہم فی الحال وہ پولیس کی حراست میں ہیں۔
پولیس حکام کے مطابق، اس کیس سے جڑے ایک ملزم پہلے ہی کسی اور مقدمے میں جیل میں ہے، ایک کی موت ہو چکی ہے، جبکہ تیسرے ملزم کی جائیداد کی چھان بین جاری ہے۔
یہ واقعہ سوشل میڈیا پر وسیع بحث کا باعث بن گیا ہے۔ ماہرین کا کہنا ہے کہ اس طرح کے اقدامات نہ صرف نوجوانوں پر منفی اثر ڈالتے ہیں بلکہ سوشل میڈیا پر غیر ذمہ دارانہ رویوں کو بھی فروغ دیتے ہیں۔