جویریہ سعود کی ہنسی پر صارفین برہم، سوشل میڈیا میں شدید تنقید

پاکستان شوبز انڈسٹری کی اداکارہ، رائٹر اور رمضان ٹرانسمیشن کی میزبان جویریہ سعود اپنے ایک پروگرام کے وائرل کلپ کی وجہ سے دوبارہ سوشل میڈیا صارفین کی توجہ کا مرکز بن گئیں۔
کلپ میں دیکھا گیا کہ لائیو شو کے دوران شکارپور سے تعلق رکھنے والے ایک شخص، سمیر، نے کال کر کے جلد میں شدید خارش کے مسئلے پر مشورہ طلب کیا۔ کالر نے بتایا کہ اس مسئلے کی وجہ سے شادی میں مشکلات پیش آ رہی ہیں کیونکہ جب بھی رشتہ دیکھنے کی بات ہوتی ہے تو خارش شروع ہو جاتی ہے۔ تاہم، کال اچانک منقطع ہوگئی اور کالر اپنی بات مکمل نہ کر سکا۔
اس دوران میزبان جویریہ سعود دوپٹے سے چہرہ چھپا کر ہنستی رہیں، جس پر سوشل میڈیا صارفین نے تنقید کی۔ صارفین نے کہا کہ کسی کے طبی مسئلے پر اس طرح کا ردعمل غیر سنجیدہ اور غیر مناسب تھا، خاص طور پر ایک مذہبی اور سنجیدہ پروگرام میں۔
واقعے کے بعد متعدد صارفین نے اظہار خیال کرتے ہوئے کہا کہ رمضان ٹرانسمیشنز سنجیدہ رہنمائی کے بجائے تفریحی رنگ اختیار کرتی جا رہی ہیں۔ کچھ افراد نے ٹی وی چینلز سے بھی مطالبہ کیا کہ لائیو کالز کے دوران زیادہ ذمہ داری اور حساسیت کا مظاہرہ کیا جائے۔