کراچی کے قریب ایم نائن موٹروے پر بھیانک ٹریفک حادثہ، 13 افراد جاں بحق

کراچی کے قریب ایم نائن موٹروے پر ایک خوفناک ٹریفک حادثے میں مسافر بس، آئل ٹینکر اور متعدد گاڑیاں آپس میں ٹکرا گئیں، جس کے نتیجے میں کم از کم 13 افراد جاں بحق اور متعدد زخمی ہوئے ہیں۔ حادثہ جمعے کو کاٹھور کے مقام پر پیش آیا، جو کراچی سے تقریباً 60 کلومیٹر دور واقع ہے۔
موٹر وے پولیس کے مطابق جاں بحق افراد کی لاشیں فوری طور پر بقائی منتقل کی گئی ہیں جبکہ زخمیوں کو سول اسپتال میں داخل کرایا گیا ہے۔ ریسکیو ذرائع کا کہنا ہے کہ حادثے میں تین خواتین اور چار بچے بھی شامل ہیں، جبکہ زخمیوں میں مختلف عمر کے بچے بھی شامل ہیں۔
ابتدائی اطلاعات کے مطابق کراچی کی جانب جانے والا آئل ٹینکر اچانک الٹ گیا، جس کے بعد پیچھے سے آنے والی کئی گاڑیاں بھی آپس میں ٹکرا گئیں۔ حادثے کا شکار ہونے والی گاڑیوں میں دو ٹریلر، دو بسیں اور ایک آئل ٹینکر شامل ہیں۔
موٹر وے پولیس نے حادثے کے مقام کو سیل کر دیا ہے اور ٹریفک کو متبادل راستوں کے ذریعے منتقل کیا جا رہا ہے۔ ریسکیو اور ایمبولینس عملے کو موقع پر فوری رسائی یقینی بنانے کے لیے راستے کلیئر کر دیے گئے ہیں۔
سندھ کے وزیراعلیٰ اور وزیر داخلہ نے حادثے پر افسوس کا اظہار کرتے ہوئے فوری رپورٹ طلب کی اور زخمیوں کو بہترین طبی سہولیات فراہم کرنے کی ہدایت دی ہے۔ آئی جی سندھ پولیس نے بھی متعلقہ حکام کو فوری طور پر جائے حادثہ پہنچنے اور علاقے کو محفوظ بنانے کی ہدایت دی ہے۔
کراچی کے ڈپٹی میئر نے متاثرہ خاندانوں سے تعزیت کا اظہار کرتے ہوئے زخمیوں کو ہر ممکن طبی سہولت فراہم کرنے کی ہدایت کی۔ عباسی شہید اسپتال میں ایمرجنسی نافذ کر دی گئی ہے تاکہ زخمیوں کو فوری علاج فراہم کیا جا سکے۔
حادثے کے بعد حفاظتی اقدامات اور ریسکیو کارروائیوں کا سلسلہ جاری ہے اور متعلقہ ادارے صورتحال پر مسلسل نگرانی کر رہے ہیں۔