پاکستان سپر لیگ عالمی سطح پر مضبوط، انٹرنیشنل میڈیا رائٹس ریکارڈ قیمت پر فروخت

پاکستان سپر لیگ نے ایک بار پھر عالمی سطح پر اپنی مضبوط حیثیت منوا لی ہے۔ لیگ کے 11ویں سیزن کے لیے بین الاقوامی میڈیا حقوق کی فروخت میں نمایاں اضافہ ریکارڈ کیا گیا ہے، جو گزشتہ سیزن کے مقابلے میں 149 فیصد زیادہ ہے۔ اس پیش رفت کے بعد پی ایس ایل پاکستان کا سب سے قیمتی اسپورٹس برانڈ بن کر ابھری ہے۔
پاکستان کرکٹ بورڈ کے مطابق پی ایس ایل 11 کے عالمی میڈیا حقوق (بھارتی خطے کے علاوہ) ایک سال کے لیے ولی ٹیکنالوجیز کو دیے گئے ہیں، جس نے مقررہ ریزرو قیمت سے بڑھ کر سب سے زیادہ بولی دی۔ یہ معاہدہ لیگ کی عالمی مقبولیت اور تجارتی کامیابی کی واضح علامت ہے۔
پی ایس ایل کے چیف ایگزیکٹو سلمان نصیر کا کہنا ہے کہ بین الاقوامی میڈیا حقوق کی فروخت کے نتائج نہایت حوصلہ افزا ہیں اور یہ اضافہ لیگ کے معیار، مسابقتی ماحول اور دنیا بھر میں شائقین کی بڑھتی دلچسپی کا ثبوت ہے۔ ان کے مطابق یہ معاہدہ پی ایس ایل کی طویل المدتی تجارتی حکمتِ عملی پر اعتماد کو مزید مضبوط کرتا ہے۔
انہوں نے ولی ٹیکنالوجیز کی جانب سے ریکارڈ بولی لگانے کو خوش آئند قرار دیتے ہوئے کہا کہ یہ شراکت داری لیگ کے لیے نئے امکانات پیدا کرے گی۔
دوسری جانب ولی ٹیکنالوجیز کے چیف ایگزیکٹو محمد احسن طاہر نے اس کامیابی کو پاکستانی ٹیکنالوجی پر اعتماد کی جیت قرار دیا۔ ان کا کہنا تھا کہ پی ایس ایل کے ساتھ یہ سفر صرف آغاز ہے اور مستقبل میں شائقین کے لیے کئی نئے منصوبے متعارف کرائے جائیں گے۔
2016 میں آغاز کے بعد سے پاکستان سپر لیگ نے میڈیا حقوق، اسپانسرشپ اور ڈیجیٹل پلیٹ فارمز کے ذریعے مسلسل ترقی کی ہے، جس کے باعث یہ نہ صرف پاکستان بلکہ عالمی ٹی 20 کرکٹ میں ایک نمایاں مقام حاصل کر چکی ہے۔
پی سی بی اور پی ایس ایل انتظامیہ کا کہنا ہے کہ عالمی نشریات کے معیار کو مزید بہتر بنانے اور لیگ کی بین الاقوامی رسائی بڑھانے کے لیے کوششیں جاری رہیں گی تاکہ دنیا بھر کے کرکٹ شائقین بہترین انداز میں پی ایس ایل سے لطف اندوز ہو سکیں۔