آئی ایم ایف نے پاکستان سے بجلی چوری اور نقصانات روکنے کا پلان طلب کرلیا

اسلام آباد – پاکستان اور عالمی مالیاتی فنڈ (آئی ایم ایف) کے درمیان جاری اقتصادی جائزہ مذاکرات کے دوران، آئی ایم ایف نے توانائی کے شعبے میں اصلاحات تیز کرنے پر زور دیا ہے۔

ذرائع کے مطابق، آئی ایم ایف نے پاکستان سے گردشی قرضے کے خاتمے، بجلی چوری کی روک تھام، اور کیپیسٹی چارجز میں کمی کے حوالے سے واضح حکمت عملی فراہم کرنے کا مطالبہ کیا ہے۔

پاکستانی حکام کا کہنا ہے کہ گردشی قرضے کو مقررہ مدت سے پہلے ختم کرنے کے لیے 1225 ارب روپے کے بینک قرض کا بندوبست کرلیا گیا ہے۔ حکام نے یقین دہانی کرائی کہ اس اقدام سے عوام پر کوئی اضافی مالی بوجھ نہیں پڑے گا، کیونکہ ادائیگیاں پہلے سے عائد 3 روپے 23 پیسے فی یونٹ سرچارج کے ذریعے کی جائیں گی۔

مزید برآں، حکام نے بتایا کہ اضافی بجلی کو صنعتی شعبے اور کرپٹو مائننگ کے لیے استعمال میں لایا جائے گا، تاکہ موجودہ وسائل کو بہتر انداز میں بروئے کار لایا جا سکے۔

آئی ایم ایف نے ڈسٹری بیوشن کمپنیوں (ڈسکوز) کی گورننس کو بہتر بنانے کے لیے اصلاحاتی اقدامات میں تیزی لانے کی ضرورت پر بھی زور دیا ہے، تاکہ نظامی نقصانات کو کم کیا جا سکے اور توانائی کے شعبے کو مالی طور پر مستحکم بنایا جا سکے۔