گوگل نے اینڈرائڈ اور آئی فون کے لیے نیامشترکہ شیئرنگ فیچر متعارف کر دیا

گوگل نے اینڈرائڈ اور آئی فون صارفین کے لیے ایک نیا مشترکہ شیئرنگ فیچر پیش کر دیا ہے، جس کا مقصد دونوں پلیٹ فارمز کے درمیان فائل شیئرنگ کے عمل کو تیز اور آسان بنانا ہے۔

ابتداء میں یہ سہولت صرف پکسل 10 سیریز کے صارفین کے لیے دستیاب ہوگی۔ گوگل کے مطابق یہ فیچر، جسے “کُوئک شیئر” کہا جاتا ہے، ایئر ڈراپ کے نظام کے ساتھ ہم آہنگ ہے، جس سے اینڈرائڈ اور آئی فون کے درمیان ڈیٹا کا تبادلہ پہلے سے کہیں زیادہ سہل ہو جائے گا۔

کمپنی نے بتایا کہ یہ فیچر جدید سیکیورٹی معیارات کے مطابق تیار کیا گیا ہے اور آزاد سیکیورٹی ماہرین نے اسے محفوظ قرار دیا ہے۔ گوگل نے مزید کہا کہ یہ اقدام اینڈرائڈ، آئی فون اور ونڈوز کے درمیان بہتر رابطے اور ہم آہنگی کی جانب ایک اہم قدم ہے، خصوصاً آر سی ایس میسجنگ اور نامعلوم ٹریکر الرٹس جیسے نئے فیچرز کے بعد۔

رپورٹ کے مطابق صارفین اس فیچر کی عملی جھلک پکسل 10 پرو پر ویڈیو کے ذریعے دیکھ سکتے ہیں اور خود بھی نئے فائل ٹرانسفر سسٹم کو آزما سکتے ہیں۔ گوگل نے اعلان کیا ہے کہ آنے والے مہینوں میں اس سروس کو مزید بہتر بنایا جائے گا اور زیادہ سے زیادہ اینڈرائڈ ڈیوائسز پر دستیاب کیا جائے گا۔