گولڈ میڈلسٹ آج ماربل فیکٹری میں مزدوری کر رہا ہے!

نوشہرہ: مارشل آرٹ اور جمناسٹک میں متعدد میڈلز جیتنے والے قومی کھلاڑی رضوان پٹھان مالی مشکلات کی وجہ سے نوشہرہ کی ایک ماربل فیکٹری میں مزدوری کرنے پر مجبور ہیں۔
ضلع باجوڑ سے تعلق رکھنے والے رضوان پٹھان نے 2018 میں قومی مارشل آرٹ مقابلوں میں گولڈ میڈل جیت کر اپنی قابلیت ثابت کی تھی اور صوبائی و مقامی سطح پر بھی کئی اعزازات حاصل کیے۔
رضوان پٹھان کے مطابق، زندگی کا موجودہ مرحلہ کھیل کے مقابلوں سے زیادہ چیلنجنگ ہے، مگر ان کا حوصلہ بلند ہے۔ انہوں نے کہا، “حالانکہ حالات مشکل ہیں، مگر میری نگاہیں ہمیشہ منزل پر ہیں۔ میری خواہش ہے کہ مجھے سرپرستی ملے تاکہ میں عالمی سطح پر پاکستان کا نام روشن کر سکوں۔”
ان کی کہانی نہ صرف ایک کھلاڑی کی ہے بلکہ ان نوجوانوں کی بھی عکاسی کرتی ہے جو وسائل کی کمی کے سبب اپنی صلاحیتوں کے باوجود آگے نہیں بڑھ پاتے۔
ماہرین کے مطابق، رضوان پٹھان جیسے کھلاڑی ملک کے قیمتی سرمایہ ہیں، اور ضروری ہے کہ انہیں معاونت فراہم کی جائے تاکہ وہ اپنے خواب پورے کر کے پاکستان کے لیے اعزاز حاصل کر سکیں