لاہور کے علاقے گلبرگ میں واقع ایک مقامی ہوٹل میں اچانک آگ بھڑک اٹھنے سے ایک شخص جان کی بازی ہار گیا، جبکہ پانچ افراد جھلس کر زخمی ہو گئے۔ ریسکیو حکام نے کارروائی کے دوران 275 افراد کو بحفاظت عمارت سے نکال لیا۔
ریسکیو کنٹرول روم کو آگ لگنے کی اطلاع دوپہر 12 بج کر 25 منٹ پر موصول ہوئی، جس کے فوراً بعد ریسکیو 1122 کی 21 ایمرجنسی گاڑیاں جائے وقوعہ پر پہنچ گئیں اورامدادی کارروائیاں شروع کردی گئیں۔
ریسکیو ترجمان کے مطابق آگ سے شدید متاثرہ حصے سے سات افراد کو نکالا گیا۔ زخمی ہونے والوں میں مبین نامی شخص شامل ہے جو 40 فیصد تک جھلس گیا، جبکہ عمران نامی فرد کو انتہائی تشویشناک حالت میں، بند نبض کے ساتھ اسپتال منتقل کیا گیا۔
ریسکیو اہلکاروں نے ہوٹل سے مجموعی طور پر 275 افراد کو محفوظ مقام پر منتقل کیا۔ تاہم سی سی ٹی وی آپریٹر شہریار اور ریاض تاحال لاپتا ہیں، جن کی تلاش کے لیے سرچ اینڈ ریسکیو آپریشن جاری ہے۔
متاثرہ عمارت 4 کنال رقبے پر قائم 19 منزلہ پلازہ ہے، جس میں تین بیسمنٹ شامل ہیں۔ آگ کے باعث بیسمنٹ ون کو شدید نقصان پہنچا ہے۔
آتشزدگی کے وقت ہوٹل میں ایک نجی اکیڈمی کی تقریب منعقد ہو رہی تھی، جس کے باعث عمارت میں افراد کی بڑی تعداد موجود تھی۔
ریسکیو ٹیمیں اب بھی ہوٹل کے اندر تلاش اور امدادی کارروائیوں میں مصروف ہیں، جبکہ آگ لگنے کی اصل وجہ جاننے کے لیے تحقیقات کا آغاز کر دیا گیا ہے۔
Leave a reply
ہاٹ لائن نیوز پر شائع ہونے والی تمام خبریں، رپورٹس، تصاویر اور وڈیوز ہماری رپورٹنگ ٹیم اور مانیٹرنگ ذرائع سے حاصل کی گئی ہیں۔ ان کو پبلش کرنے سے پہلے اسکے مصدقہ ذرائع کا ہرممکن خیال رکھا گیا ہے، تاہم کسی بھی خبر یا رپورٹ میں ٹائپنگ کی غلطی یا غیرارادی طور پر شائع ہونے والی غلطی کی فوری اصلاح کرکے اسکی تردید یا درستگی فوری طور پر ویب سائٹ پر شائع کردی جاتی ہے۔