کھیل، شہرت اور سرمایہ: رونالڈو کی ناقابلِ یقین کامیابی

عالمی شہرت یافتہ پرتگالی فٹبالر کرسٹیانو رونالڈو نے ایک اور تاریخی سنگِ میل عبور کر لیا ہے۔ وہ دنیا کے پہلے ایسے فٹبالر بن چکے ہیں جن کی مجموعی دولت 1.4 ارب ڈالر سے تجاوز کر گئی ہے۔ یہ سنگِ میل معروف مالیاتی فہرست بلومبرگ بلینیئرز انڈیکس نے اپنے تازہ شمارے میں رونالڈو کو شامل کر کے تسلیم کیا ہے۔

تقریباً دو دہائیوں پر محیط شاندار کیرئیر میں رونالڈو نے یورپ کے بڑے کلبز جیسے مانچسٹر یونائیٹڈ، ریئل میڈرڈ اور یووینٹس کی نمائندگی کی، اور کھیل کے ساتھ ساتھ عالمی برانڈز کے اشتہارات میں بھی نمایاں مقام حاصل کیا۔ نائکی، ارمانی اور کیسٹرول جیسے برانڈز کے ساتھ کیے گئے معاہدے ان کی آمدنی کا بڑا ذریعہ بنے۔

2023 میں رونالڈو نے سعودی عرب کے کلب النصر سے معاہدہ کر کے فٹبال کی دنیا کا ایک بڑا مالی معاہدہ حاصل کیا۔ رپورٹ کے مطابق، یہ معاہدہ سالانہ 200 ملین ڈالر کی ٹیکس فری تنخواہ اور دیگر مراعات پر مشتمل ہے، جس میں نجی طیارہ، رہائش اور کلب کی ملکیت کا 15 فیصد حصہ شامل ہے۔

رونالڈو نہ صرف میدان میں بلکہ سوشل میڈیا پر بھی ایک طاقتور شخصیت ہیں۔ انسٹاگرام پر ان کے فالوورز کی تعداد 660 ملین سے تجاوز کر چکی ہے، جس سے وہ دنیا کے سب سے زیادہ فالو کیے جانے والے فرد بن چکے ہیں۔ سعودی حکام بھی ان کی شہرت کو ملک کے سیاحتی تشخص کے فروغ کے لیے استعمال کر رہے ہیں۔

رونالڈو اور لیونل میسی کے درمیان برسوں سے معاوضے کا مقابلہ جاری رہا، لیکن النصر میں شمولیت کے بعد رونالڈو کی آمدنی واضح طور پر میسی سے بڑھ چکی ہے۔ میسی نے اگرچہ ایپل اور انٹر میامی کے ساتھ معاہدے کیے ہیں، تاہم رونالڈو کی سالانہ آمدنی کئی گنا زیادہ ہے۔

رونالڈو نے مختلف ممالک میں پرتعیش جائیدادوں میں سرمایہ کاری کر رکھی ہے، جن میں پرتگال کا ماڈیرا جزیرہ، لزبون کا مہنگا ترین پینٹ ہاؤس، اور معروف گالف ریزورٹ “کنٹا دا مارینیا” میں جائیداد شامل ہے۔ ان کی یہ جائیدادیں نہ صرف ان کی دولت کی عکاس ہیں بلکہ سیاحوں کی توجہ کا مرکز بھی بنی ہوئی ہیں۔

رونالڈو نے عندیہ دیا ہے کہ وہ اپنا فٹبال کیرئیر النصر ہی میں مکمل کرنا چاہتے ہیں۔ کھیل کے بعد وہ ممکنہ طور پر فٹبال کلبز کی ملکیت، کاروباری منصوبے اور جائیدادوں کے ذریعے اپنی دولت کو مزید بڑھائیں گے۔ ڈیوڈ بیکھم کی طرح فٹبال مینجمنٹ میں قدم رکھنا بھی ان کے اہداف میں شامل ہے۔