کولمبیا میں فوجی طیارہ گر کر تباہ، 66 افراد ہلاک

کولمبیا کے جنوبی علاقے میں ایک فوجی کارگو طیارہ حادثے کا شکار ہو گیا، جس کے نتیجے میں کم از کم 66 افراد کی ہلاکت کی تصدیق ہو چکی ہے جبکہ مزید افراد کی تلاش جاری ہے۔
ملکی وزارتِ دفاع کے مطابق فضائیہ کا سی-130 ہرکولیس طیارہ پورٹو لیگویزامو سے اڑان بھرنے کے کچھ ہی دیر بعد گر کر تباہ ہوا۔ طیارے میں فوجی اہلکاروں سمیت مجموعی طور پر 128 افراد سوار تھے، جن میں فضائیہ کے 11 اہلکار، 115 فوجی جوان اور دو پولیس اہلکار شامل تھے۔
حادثے کے فوراً بعد امدادی ٹیمیں موقع پر پہنچ گئیں اور زخمیوں کو نکالنے کے ساتھ ساتھ لاپتہ افراد کی تلاش کا عمل شروع کر دیا گیا۔
ابتدائی اطلاعات کے مطابق طیارہ ممکنہ طور پر رن وے کے آخری حصے کے قریب کسی رکاوٹ سے ٹکرا گیا، جس کے بعد وہ درختوں سے جا لگا اور زمین پر گر کر آگ کی لپیٹ میں آ گیا۔ آگ لگنے کے باعث طیارے میں موجود ممکنہ دھماکہ خیز مواد بھی پھٹنے کی اطلاعات ہیں، جس سے نقصان میں اضافہ ہوا۔
کولمبیا کے صدر نے حادثے پر گہرے افسوس کا اظہار کرتے ہوئے متاثرہ خاندانوں سے تعزیت کی ہے اور واقعے کی مکمل اور شفاف تحقیقات کا حکم دیا ہے۔ حکومت نے فوجی فضائی بیڑے کی جدید کاری کے عمل کو تیز کرنے کا بھی اعلان کیا ہے۔
وزیر دفاع نے عوام سے اپیل کی ہے کہ سرکاری معلومات کے انتظار میں غیر مصدقہ خبروں اور قیاس آرائیوں سے گریز کیا جائے۔
ریسکیو ادارے اور متعلقہ حکام علاقے میں امدادی کارروائیاں جاری رکھے ہوئے ہیں جبکہ حادثے کی وجوہات جاننے کے لیے تحقیقات شروع کر دی گئی ہیں۔