چین میں پرانے سم کارڈز سے سونا نکالنے والا شخص وائرل، آن لائن مارکیٹ میں خریداری کی لہر

چین کے جنوب مشرقی صوبے گوانگ ڈونگ میں ایک شہری نے پرانے سم کارڈز سے تقریباً 191 گرام سونا نکال کر سوشل میڈیا پر دھوم مچا دی ہے۔ اس ویڈیو کے بعد آن لائن مارکیٹ میں پرانے سم کارڈز کی خریداری میں تیزی دیکھنے کو ملی، تاہم اس شخص نے خبردار کیا کہ یہ عمل خطرناک اور بعض اوقات غیر قانونی بھی ہو سکتا ہے۔
ساؤتھ چائنا مارننگ پوسٹ کے مطابق، ہوئی ژو کے رہائشی “چیاؤ” الیکٹرانک فضلہ سے قیمتی دھاتیں نکالنے اور صاف کرنے میں ماہر ہیں۔ 20 جنوری کو انہوں نے ایک ویڈیو شیئر کی جس میں سم کارڈز سے سونا نکالنے کے پیچیدہ مراحل دکھائے گئے۔ ویڈیو کو پانچ ملین سے زائد بار دیکھا گیا۔
چیاؤ نے بتایا کہ انہوں نے تقریباً دو ٹن الیکٹرانک فضلہ استعمال کیا، جس میں صرف سم کارڈز نہیں بلکہ دیگر ٹیلی کمیونیکیشن اور الیکٹرانک چپس بھی شامل تھیں۔ سم کارڈز کے اہم حصے عام طور پر سونے کی باریک کوٹنگ سے محفوظ کیے جاتے ہیں تاکہ یہ دیرپا اور زنگ سے محفوظ رہیں۔
مین لینڈ چین کے مطابق، ایک عام سم کارڈ میں تقریباً 0.001 گرام یا اس سے کم سونا ہوتا ہے۔ اسی طرح، بینک کارڈ چپس اور دیگر الیکٹرانک آلات کے رابطے والے حصے بھی سونے کے لیے ری سائیکل کیے جا سکتے ہیں۔
ویڈیو کے وائرل ہونے کے بعد چین میں پرانے سم کارڈز کی خریداری میں اضافہ ہوا، اور کچھ آن لائن دکانوں نے سونا نکالنے کے ٹولز اور تعلیمی ویڈیوز بھی فروخت کرنا شروع کر دی ہیں۔
چیاؤ نے واضح کیا کہ ان کا مقصد صرف اپنے علم کو شیئر کرنا تھا اور قانونی طور پر مخصوص الیکٹرانک آلات کی صفائی کرنا ہے، نہ کہ عام افراد کو سونا نکالنے کی ترغیب دینا۔ انہوں نے خبردار کیا کہ یہ عمل خطرناک اور بعض اوقات غیر قانونی بھی ہو سکتا ہے۔
چین میں سونا صاف کرنے اور اس کی تجارت سخت قوانین کے تحت ہوتی ہے، اور غیر قانونی طور پر یہ عمل کرنے والوں کو بھاری جرمانہ یا قید کی سزا ہو سکتی ہے۔