چاہت فتح علی خان کا علی حیدر کے بیان پر ردِ عمل

سوشل میڈیا پر اپنے منفرد انداز میں مقبول ہونے والے گلوکار چاہت فتح علی خان نے حال ہی میں ایک انٹرویو میں پاکستانی گلوکار علی حیدر کے ایک بیان پر طنزیہ ردِ عمل دیا ہے۔

علی حیدر نے ایک نجی ٹی وی پروگرام میں شرکت کے دوران میزبان کے ایک سوال کے جواب میں کہا تھا کہ وہ چاہت فتح علی خان کے ساتھ گانا نہیں گائیں گے، چاہے 20 کروڑ روپے بھی دیے جائیں۔ انہوں نے مزید کہا کہ چاہت کو اپنی زندگی جینے دی جائے، یہ ان کا وقت ہے اور شاید یہ اللہ کی طرف سے ان کی کسی دعا کا اثر ہو۔

اس بیان پر ردِعمل دیتے ہوئے، چاہت فتح علی خان نے ایک یوٹیوب انٹرویو میں علی حیدر کے مشہور گانے کا حوالہ دے کر ہلکے پھلکے طنز کے انداز میں جواب دیا۔ انہوں نے کہا کہ علی حیدر اب کراچی چھوڑ کر امریکا جا چکے ہیں، اور اگر وہ 20 کروڑ لینے کے بعد بھی ان کے ساتھ گانا نہ گائیں تو کوئی بات نہیں۔ ساتھ ہی انہوں نے مذاقاً کہا کہ وہ خود ایک غریب انسان ہیں اور اتنی بڑی رقم دینے کی استطاعت نہیں رکھتے۔

یاد رہے کہ چاہت فتح علی خان اپنے غیر روایتی گلوکاری انداز اور انٹرنیٹ پر وائرل ویڈیوز کے باعث نوجوانوں میں خاصے مقبول ہیں، جبکہ علی حیدر پاکستان کی پاپ موسیقی کے ایک معتبر نام کے طور پر جانے جاتے ہیں۔