پیٹرولیم مصنوعات کی قیمتوں میں نمایاں اضافےکاامکان

اسلام آباد: آئندہ پندرہ روز کے لیے پیٹرولیم مصنوعات کی قیمتوں میں نمایاں اضافے کا امکان ظاہر کیا جا رہا ہے، اور تخمینوں کے مطابق فی لیٹر قیمت میں تقریباً 9.60 روپے تک اضافہ ہو سکتا ہے۔

پیٹرولیم شعبے سے تعلق رکھنے والے ماہرین کا کہنا ہے کہ عالمی مارکیٹ میں ڈیزل کی قلت اس متوقع اضافہ کی اہم وجہ ہے۔ پاکستان کی ڈیزل کی زیادہ تر درآمدات کویت سے ہوتی ہیں، مگر وہاں ایک بڑی ریفائنری کی مرمت کے باعث سپلائی میں کمی واقع ہوئی ہے۔

اطلاعات کے مطابق کویت کی الزور ریفائنری میں مرمت کا عمل، جو نومبر کے آغاز میں مکمل ہونا تھا، مزید دو ہفتوں تک بڑھا دیا گیا ہے۔ اس تاخیر کے باعث خطے میں ڈیزل کی کمی پیدا ہوئی ہے جس نے عالمی قیمتوں پر بھی دباؤ بڑھا دیا ہے۔

مزید یہ کہ ریفائنری کے تین میں سے صرف دو یونٹ فعال ہیں، جس سے ہائی اسپیڈ ڈیزل کی پیداوار کم ہو گئی ہے اور اس کا براہِ راست اثر قیمتوں میں اضافے کی صورت میں سامنے آ رہا ہے۔