پنجاب میں سرکاری بھرتیوں کا نیا دور، پی پی ایس سی نے میرٹ فارمولا بدل دیا

لاہور: پنجاب پبلک سروس کمیشن نے بھرتیوں کے عمل میں شفافیت اور انصاف کو یقینی بنانے کے لیے میرٹ کے نظام میں اہم اصلاحات متعارف کرانے کا اعلان کیا ہے۔

نئے فیصلے کے مطابق، امیدواروں کو تعلیمی ڈگریوں میں حاصل کردہ نمبروں کی بنیاد پر اضافی مارکس نہیں دیے جائیں گے۔ میرٹ کا تعین اب صرف کمیشن کے تحریری امتحانات اور انٹرویوز کے نتائج پر کیا جائے گا، جبکہ تحریری امتحان کو مرکزی حیثیت حاصل ہوگی۔

مزید برآں، تحقیقاتی کام اور غیر کلینیکل تجربے پر دیے جانے والے اضافی نمبروں کا نظام بھی ختم کر دیا گیا ہے۔ یہ نئی پالیسی یکم جنوری 2026 سے نافذالعمل ہوگی، جس کے بعد تمام امیدواروں کے لیے میرٹ کا ایک یکساں معیار لاگو ہو گا۔

یہ فیصلے فل کمیشن اجلاس میں ریفارمز کمیٹی کی سفارشات کی روشنی میں کیے گئے، جس کی صدارت ریٹائرڈ انسپکٹر جنرل اور کمیشن کے رکن عارف نواز خان نے کی۔

چیئرمین پی پی ایس سی، لیفٹیننٹ جنرل (ریٹائرڈ) محمد عبدالعزیز کے مطابق، یہ اصلاحات بین الاقوامی پبلک سروس کمیشنز کے ماڈلز کا مطالعہ کرنے کے بعد متعارف کرائی گئی ہیں تاکہ پنجاب کے نظام کو عالمی معیار کے مطابق بنایا جا سکے۔

انہوں نے کہا کہ کمیشن میرٹ، شفافیت اور مساوی مواقع کی فراہمی کے لیے پرعزم ہے تاکہ ہر امیدوار کو اپنی صلاحیت کے مطابق منصفانہ موقع مل سکے۔