پنجاب حکومت کا شہداء کے لیے خصوصی پیکج کا اعلان

لاہور: پنجاب حکومت نے دورانِ فرائض شہید ہونے والے سرکاری ملازمین کے لیے مالی اور رہائشی سہولیات پر مشتمل خصوصی پیکج کی منظوری دے دی ہے۔

یہ فیصلہ وزیر قانون پنجاب ملک صہیب احمد کی زیر صدارت اجلاس میں کیا گیا، جس میں پولیس کے 17 شہداء کے اہلِ خانہ کو مالی امداد اور گھر دینے کی منظوری دی گئی۔

تفصیلات کے مطابق:

پیکج ٹو کے تحت شہید ہونے والے اے ایس آئی کے ورثا کو 50 لاکھ روپے، ایک گھر اور دیگر مراعات دی جائیں گی۔

اسی پیکج کے تحت شہید کانسٹیبل اور ہیڈ کانسٹیبل کے اہل خانہ کو 40 لاکھ روپے، ایک گھر اور اضافی مراعات دی جائیں گی۔

پیکج تھری کے تحت شہید کانسٹیبل اور ٹریفک وارڈن کے ورثا کو 35 لاکھ روپے اور دیگر سہولیات فراہم کی جائیں گی۔

مزید برآں، صوبائی وزیر نے اعلان کیا کہ پیکج تھری کے تحت شہداء کو بھی رہائشی مراعات دینے کا فیصلہ کیا گیا ہے، جس کے لیے رولز میں تبدیلی کی منظوری پنجاب کابینہ سے لی جائے گی۔