پشاور: ایف سی ہیڈکوارٹر پر حملے میں 20 کلوگرام بارودی مواد استعمال ہوا، بی ڈی یو رپورٹ

پشاور میں بم ڈسپوزل یونٹ (بی ڈی یو) نے فیڈرل کانسٹیبلری (ایف سی) ہیڈکوارٹرز پر 24 نومبر کو ہونے والے حملے سے متعلق اپنی تفصیلی رپورٹ جاری کر دی ہے۔ رپورٹ کے مطابق حملہ خودکش تھا اور حملہ آوروں نے خودکش جیکٹس میں تقریباً 20 کلوگرام بارودی مواد چھپا رکھا تھا، جو جیکٹس کے آگے اور پیچھے دو حصوں میں تقسیم تھا۔

بی ڈی یو کی رپورٹ میں بتایا گیا ہے کہ دھماکے کے اثرات 30 میٹر تک پہنچ سکتے تھے، تاہم بروقت حفاظتی اقدامات سے بڑا نقصان ہونے سے بچ گیا۔ جائے وقوعہ سے 8 دستی بم، 2 ملی میٹر کے بال بیرنگ اور تقریباً 2 فٹ کے پرائما کارڈ بھی برآمد ہوئے، لیکن ریموٹ کنٹرول کے استعمال کا کوئی ثبوت نہیں ملا۔

رپورٹ میں مزید بتایا گیا ہے کہ اس حملے میں ایف سی کے 3 اہلکار شہید اور 5 زخمی ہوئے، جبکہ 8 عام شہری بھی زخمی ہوئے۔ بی ڈی یو نے اس بات پر زور دیا ہے کہ حملہ منظم اور منصوبہ بندی کے تحت کیا گیا تھا، لیکن حفاظتی اقدامات نے بڑے نقصان کو روک دیا۔