پاک فوج کے ترجمان کا بیان: افغانستان میں خوارج کے خلاف مؤثر کارروائیاں جاری رہیں گی

لیفٹیننٹ جنرل احمد شریف چوہدری نے کہا ہے کہ پاکستان نے افغانستان میں خوارج کی موجودگی کے خلاف مؤثر اقدامات کیے ہیں اور آئندہ بھی پاک فوج ہر دشمن کی جارحیت کے خلاف مضبوط اور پائیدار دفاع فراہم کرتی رہے گی۔

انہوں نے نوجوانوں کو قوم کا روشن مستقبل قرار دیتے ہوئے کہا کہ ملکی ترقی اور خوشحالی میں ان کا کردار انتہائی اہمیت کا حامل ہے۔

لیفٹیننٹ جنرل احمد شریف چوہدری نے غلام اسحاق خان انسٹیٹیوٹ آف انجینئرنگ سائنسز اینڈ ٹیکنالوجی کا دورہ کیا جہاں انہوں نے طلبہ سے حالیہ پاک افغان سرحدی جھڑپوں، ملکی سیکیورٹی صورتحال اور سوشل میڈیا پر پھیلنے والی غلط معلومات کے حوالے سے گفتگو کی۔

اس موقع پر طلبہ اور اساتذہ نے شہداء اور غازیانِ پاک فوج کو خراج تحسین پیش کیا اور اس بات پر زور دیا کہ ایسی نشستیں زیادہ منعقد کی جائیں تاکہ ملک میں ڈس انفارمیشن اور پروپیگنڈے کا مؤثر خاتمہ کیا جا سکے۔

طلبہ نے فخر کا اظہار کیا کہ پاک فوج نے دشمن کو ہر محاذ پر بھرپور اور فیصلہ کن جواب دیا ہے اور قوم فوج کی امن، استحکام اور ترقی کے لیے کی گئی کوششوں کو قدر کی نگاہ سے دیکھتی ہے۔