پاکستان اور متحدہ عرب امارات نے مسافروں کے لیے سفر کے عمل کو مزید آسان بنانے کے مقصد سے پری امیگریشن کلیئرنس کے نظام پر باضابطہ اتفاق کر لیا ہے۔ اس نئے انتظام کے تحت مسافروں کی امیگریشن کلیئرنس روانگی سے قبل پاکستان میں ہی مکمل ہو سکے گی، جس سے یو اے ای پہنچنے پر امیگریشن کے طویل مراحل سے بچاؤ ممکن ہوگا۔
نئے نظام کا آغاز ابتدائی طور پر کراچی سے بطور پائلٹ منصوبہ کیا جائے گا، جبکہ بعد ازاں اس سہولت کو مرحلہ وار دیگر شہروں تک توسیع دی جائے گی۔
اس حوالے سے وزیرِ داخلہ محسن نقوی سے متحدہ عرب امارات کے ڈی جی کسٹمز و پورٹ سیکیورٹی کی قیادت میں آنے والے یو اے ای کے وفد نے ملاقات کی۔ ملاقات میں دونوں ممالک کے درمیان تعاون، باہمی تعلقات اور مسافروں کے لیے امیگریشن کے عمل کو مزید مؤثر بنانے پر گفتگو کی گئی۔
وزیرِ داخلہ کا کہنا تھا کہ پری امیگریشن کلیئرنس کے نفاذ سے مسافروں کو یو اے ای پہنچنے پر امیگریشن کاؤنٹرز پر انتظار اور تاخیر کا سامنا نہیں کرنا پڑے گا، جس سے سفری سہولت میں نمایاں بہتری آئے گی۔
یو اے ای کے وفد نے اس منصوبے کے لیے مکمل تعاون کی یقین دہانی کراتے ہوئے کہا کہ اس اقدام سے نہ صرف عوام کو سہولت حاصل ہوگی بلکہ پاکستان اور متحدہ عرب امارات کے دوطرفہ تعلقات بھی مزید مضبوط ہوں گے۔
Leave a reply
ہاٹ لائن نیوز پر شائع ہونے والی تمام خبریں، رپورٹس، تصاویر اور وڈیوز ہماری رپورٹنگ ٹیم اور مانیٹرنگ ذرائع سے حاصل کی گئی ہیں۔ ان کو پبلش کرنے سے پہلے اسکے مصدقہ ذرائع کا ہرممکن خیال رکھا گیا ہے، تاہم کسی بھی خبر یا رپورٹ میں ٹائپنگ کی غلطی یا غیرارادی طور پر شائع ہونے والی غلطی کی فوری اصلاح کرکے اسکی تردید یا درستگی فوری طور پر ویب سائٹ پر شائع کردی جاتی ہے۔