پاکستان اور انڈونیشیا کے درمیان پام آئل تعاون کے نئے معاہدے

پاکستان اور انڈونیشیا نے باہمی اقتصادی تعلقات کو فروغ دینے کے لیے پام آئل کی تجارت سے متعلق اہم معاہدے طے کر لیے ہیں۔ یہ پیش رفت دونوں ممالک کے درمیان 75 سالہ سفارتی تعلقات کی تکمیل اور دسمبر 2025 میں انڈونیشیا کے صدر پرابوو سبیانتو کے متوقع دورۂ پاکستان کے تسلسل کا حصہ ہے۔
معاہدوں پر دستخط کی تقریب اسلام آباد میں انڈونیشیا کے سفارت خانے اور کراچی میں انڈونیشیا کے قونصل جنرل کے زیرِ اہتمام منعقد ہوئی، جس میں انڈونیشین پام آئل ایسوسی ایشن (GAPKI) نے تعاون کیا۔ تقریب میں انڈونیشیا کی نائب وزیرِ تجارت دیاح رورو استی ودیا پتری، پاکستان کے وفاقی وزیرِ تجارت جام کمال خان، پاکستان میں انڈونیشیا کے سفیر چندرا ڈبلیو سوکوتجو اور دیگر اعلیٰ حکام نے شرکت کی۔
کراچی میں تقریب سے خطاب کرتے ہوئے انڈونیشیا کی نائب وزیرِ تجارت نے کہا کہ پاکستان انڈونیشیا کے لیے ایک اہم تجارتی شراکت دار ہے اور پاکستانی منڈی، صنعت اور صارفین ان کے لیے خصوصی اہمیت رکھتے ہیں۔
اس موقع پر انڈونیشیا کے سفیر نے کہا کہ پاکستان اور انڈونیشیا کے تعلقات اب ایک زیادہ اسٹریٹجک اور مستقبل پر مبنی مرحلے میں داخل ہو چکے ہیں۔ ان کا کہنا تھا کہ پام آئل دوطرفہ تجارت کا اہم جزو ہے، تاہم انڈونیشیا متوازن اور وسیع تر اقتصادی تعاون کو فروغ دینا چاہتا ہے۔
GAPKI کے چیئرمین ایڈی مارٹونو نے کہا کہ ان کی تنظیم حکومتوں کے ساتھ مل کر پاکستان کو پام آئل کی مستحکم اور ذمہ دار سپلائی یقینی بنانے کے لیے کام کر رہی ہے۔ انہوں نے بتایا کہ انڈونیشین پیداواری اداروں اور پاکستانی خریداروں کے درمیان براہِ راست تجارتی روابط بڑھانے اور ریفائننگ و پروسیسنگ کے شعبوں میں تکنیکی تعاون کو فروغ دیا جائے گا۔
تقریب کے دوران تین اہم معاہدوں پر دستخط کیے گئے جن میں مشترکہ تجارتی کمیشن کے قیام کا معاہدہ بھی شامل ہے، جبکہ GAPKI اور پاکستان کی خوردنی تیل و ویجیٹیبل آئل مینوفیکچررز کی تنظیموں کے درمیان دو مفاہمتی یادداشتوں پر بھی اتفاق ہوا۔ دونوں ممالک نے ریفائننگ، حلال سرٹیفکیشن، پائیداری اور بندرگاہی لاجسٹکس کے شعبوں میں مشترکہ منصوبوں کے امکانات کا جائزہ لینے پر بھی اتفاق کیا، اور کراچی کو جنوبی ایشیا میں اقتصادی سرگرمیوں کے فروغ کے لیے ایک اہم مرکز قرار دیا گیا۔