ٹک ٹاکر سامعہ حجاب کو اغوا کی کوشش، مبینہ ملزم گرفتار

اسلام آباد: سوشل میڈیا پر سرگرم ٹک ٹاکر سامعہ حجاب کو ہراساں اور اغوا کرنے کی مبینہ کوشش کے الزام میں اسلام آباد پولیس نے ایک شخص کو گرفتار کر لیا ہے۔

پولیس کے مطابق، گرفتار شخص کی شناخت حسن زاہد کے نام سے ہوئی ہے جس پر سامعہ حجاب کو قتل، اغوا اور ہراساں کرنے کی سنگین دھمکیاں دینے کا الزام ہے۔ یہ کارروائی سامعہ کی جانب سے درج کرائی گئی شکایت اور سوشل میڈیا پر جاری ویڈیو بیان کے بعد عمل میں لائی گئی۔

متاثرہ خاتون نے الزام عائد کیا کہ حسن زاہد کئی روز سے ان کا پیچھا کر رہا تھا، تحائف دے کر دباؤ ڈالنے کی کوشش کر رہا تھا اور شادی کی پیشکش سے انکار پر جان سے مارنے کی دھمکیاں دینے لگا۔ سامعہ نے بتایا کہ ملزم ان کے گھر تک پہنچ گیا اور زبردستی ساتھ چلنے کا مطالبہ کیا۔

ایک ویڈیو بیان میں سامعہ نے دعویٰ کیا کہ ملزم نے ان کے گھر کی گھنٹی بجائی اور دروازہ کھلنے پر ان کے فون کو چھین کر گاڑی میں بیٹھ گیا۔ جب وہ فون واپس لینے گئیں تو حسن زاہد نے ان کے ساتھ بدتمیزی کی اور اغوا کی کوشش کی۔

پولیس ترجمان کے مطابق، تھانہ شالیمار میں مقدمہ درج کر لیا گیا ہے جس میں خواتین کو ہراساں کرنے، زبردستی، اغوا کی کوشش اور دیگر دفعات شامل کی گئی ہیں۔ مزید تفتیش جاری ہے اور شواہد اکٹھے کیے جا رہے ہیں۔