ٹرمپ کا دعویٰ: بھارت ایران کے بجائے وینزویلا سے تیل خریدے گا

امریکا کے صدر ڈونلڈ ٹرمپ نے ہفتے کے روز کہا ہے کہ بھارت مستقبل میں ایران کے بجائے وینزویلا سے تیل حاصل کرے گا۔
یہ بات صدر ٹرمپ نے واشنگٹن ڈی سی سے فلوریڈا کے سفر کے دوران ایئر فورس ون میں صحافیوں سے گفتگو کرتے ہوئے کہی۔ ان کے مطابق اس حوالے سے باقاعدہ معاہدہ یا کم از کم اس کا بنیادی خاکہ طے پا چکا ہے۔
صدر ٹرمپ کا یہ بیان ایسے وقت سامنے آیا ہے جب اس سے ایک دن قبل امریکا نے بھارت کو آگاہ کیا تھا کہ وہ روسی تیل کے متبادل کے طور پر وینزویلا سے تیل کی درآمد دوبارہ شروع کرنے پر غور کر سکتا ہے۔
اس معاملے سے باخبر ذرائع کے مطابق یہ تجویز بھارت کی بڑھتی ہوئی توانائی ضروریات کو پورا کرنے کے لیے زیرِ غور ہے۔ خبر رساں ادارے رائٹرز کے مطابق امریکا کی جانب سے بھارت کو وینزویلا کا خام تیل فراہم کرنے کی کوششیں اس حکمتِ عملی کا حصہ ہیں جس کا مقصد روس کی تیل سے ہونے والی آمدنی کو کم کرنا ہے، کیونکہ یہی آمدنی یوکرین جنگ میں روس کی مالی مدد کر رہی ہے۔
یہ بات قابلِ ذکر ہے کہ صدر ٹرمپ نے گزشتہ برس مارچ میں وینزویلا سے تیل خریدنے والے ممالک پر 25 فیصد ٹیرف عائد کیا تھا، جن میں بھارت بھی شامل تھا۔
صدر ٹرمپ نے مزید کہا کہ چین بھی امریکا کے ساتھ وینزویلا سے تیل کی خریداری کے کسی ممکنہ معاہدے میں دلچسپی لے سکتا ہے، اور اگر ایسا ہوتا ہے تو امریکا اس کا خیرمقدم کرے گا۔