وہ لمحہ جو ہر 33 سال بعد آتا ہے: کیا آپ تیار ہیں؟

ماہرین فلکیات کے مطابق سن 2030 میں مسلمانوں کو ایک نادر موقع ملے گا جب رمضان المبارک ایک ہی عیسوی سال میں دو مرتبہ آئے گا۔ اس کی وجہ اسلامی قمری کیلنڈر اور عیسوی شمسی کیلنڈر کے درمیان فرق ہے۔
اسلامی کیلنڈر چاند کی گردش پر مبنی ہے اور اس کا سال تقریباً 354 دنوں پر مشتمل ہوتا ہے، یعنی عیسوی سال سے تقریباً 10 سے 11 دن کم۔ اسی وجہ سے رمضان ہر سال دس سے گیارہ دن پہلے آتا ہے۔
ماہرین کے مطابق 2030 میں رمضان پہلی بار 5 جنوری (اسلامی سال 1451 ہجری) کو شروع ہوگا، جبکہ دوسری بار 26 دسمبر (اسلامی سال 1452 ہجری) کو آغاز ہوگا۔ اس طرح مسلمان اس سال 36 روزے رکھیں گے، جن میں 30 روزے جنوری میں اور 6 روزے دسمبر میں ہوں گے۔
یہ نایاب موقع تقریباً ہر 33 سال بعد پیش آتا ہے، کیونکہ اسلامی مہینے شمسی کیلنڈر کے ساتھ ہر سال مختلف موسموں سے گزرتے ہیں۔ اس سے قبل یہ واقعہ 1997 میں ہوا تھا اور اگلی بار 2063 میں ہوگا۔
رمضان المبارک میں فجر سے غروب آفتاب تک روزہ رکھنا فرض ہے، جو عبادت، صبر اور روحانی پاکیزگی کا ذریعہ سمجھا جاتا ہے۔ روزے کا دورانیہ موسم کے مطابق مختلف ہوتا ہے، سردیوں میں کم اور گرمیوں میں بعض اوقات 17 گھنٹے یا اس سے زیادہ بھی ہو سکتا ہے۔
اگرچہ رمضان کی ابتدا فلکیاتی حساب سے طے کی جا سکتی ہے، تاہم بیشتر اسلامی ممالک انسانی رویتِ ہلال پر عمل کرتے ہیں۔ سعودی عرب سمیت کئی ممالک اس روایت کو مقدم رکھتے ہیں، جبکہ بعض ممالک سائنسی حسابات کو بھی استعمال کرتے ہیں۔
ماہرین کا کہنا ہے کہ 2030 میں رمضان کے دو بار آنے کا یہ موقع مسلمانوں کے لیے ایک منفرد روحانی تجربہ ہوگا، جو عبادت اور صبر کے نئے پہلو کھولے گا۔