وفاقی وزیر اطلاعات نے جعلی اسمارٹ لاک ڈاؤن نوٹیفکیشن کی تردید کر دی

وفاقی وزیرِ اطلاعات عطااللہ تارڑ نے واضح کیا ہے کہ سوشل میڈیا پر گردش کرنے والا اسمارٹ لاک ڈاؤن سے متعلق نوٹیفکیشن جعلی ہے اور اس کا حکومتی پالیسی سے کوئی تعلق نہیں۔

اپنے بیان میں انہوں نے کہا کہ حکومت کی جانب سے ایسا کوئی باضابطہ نوٹیفکیشن جاری نہیں کیا گیا۔ انہوں نے عوام سے اپیل کی کہ غیر مصدقہ معلومات پر یقین کرنے سے گریز کریں اور صرف مستند ذرائع پر بھروسہ کریں۔

ذرائع کے مطابق وفاقی حکومت ملک میں ممکنہ اسمارٹ لاک ڈاؤن کے حوالے سے صوبوں اور متعلقہ اداروں سے مشاورت کر رہی ہے۔ اس سلسلے میں مختلف تجاویز زیر غور ہیں اور حتمی فیصلہ تمام اسٹیک ہولڈرز کی رائے کے بعد کیا جائے گا۔

حکام کا کہنا ہے کہ اس عمل میں معاشی سرگرمیوں کو مدنظر رکھا جا رہا ہے۔ اسی مقصد کے لیے وزارتِ خزانہ کو ہدایت دی گئی ہے کہ وہ ممکنہ لاک ڈاؤن کے کاروبار، صنعت اور سروس سیکٹر پر اثرات کا جائزہ لے۔

ذرائع کے مطابق زیر غور تجاویز میں تقریبات پر پابندیاں، بعض سرگرمیوں کو محدود کرنا اور ٹریفک سے متعلق اقدامات شامل ہو سکتے ہیں، تاہم ابھی تک کسی حتمی حکمت عملی کی منظوری نہیں دی گئی۔

حکومت کا کہنا ہے کہ جب بھی کوئی فیصلہ کیا جائے گا، اس کا باضابطہ اعلان اور مستند نوٹیفکیشن جاری کیا جائے گا۔ اس سے قبل سوشل میڈیا پر ایک مبینہ نوٹیفکیشن وائرل ہوا تھا جس میں ہفتہ وار دو روزہ اسمارٹ لاک ڈاؤن اور دیگر پابندیوں کا ذکر کیا گیا تھا، تاہم حکام نے اسے بے بنیاد قرار دیا ہے۔