ندا یاسر کے بیان پر فضا علی کی کھلی تنقید، صارفین کی حمایت حاصل

معروف اداکارہ اور ٹی وی میزبان فضا علی نے ندا یاسر کے فوڈ ڈیلیوری رائیڈرز کے حوالے سے دیے گئے حالیہ بیان پر شدید تنقید کی ہے۔

ندا یاسر نے اپنے شو میں کہا تھا کہ بعض ڈیلیوری رائیڈرز جان بوجھ کر چھوٹے نوٹ ساتھ نہیں رکھتے تاکہ کسٹمرز کو اضافی ٹپ دینے پر مجبور کیا جا سکے۔ ان کے مطابق اس وجہ سے صارفین کو کئی مشکلات کا سامنا کرنا پڑتا ہے اور یہ عادت اب کئی رائیڈرز میں عام ہو گئی ہے۔

ان کے اس بیان پر سوشل میڈیا صارفین نے ردعمل ظاہر کیا اور کہا کہ یہ موقف محنت کشوں کے لیے غیر حساس ہے۔

اس پر جواب دیتے ہوئے فضا علی نے کہا کہ ڈیلیوری رائیڈرز اکثر رات دیر یا خراب موسم میں کھانے پہنچاتے ہیں اور اپنی زندگی کو خطرے میں ڈال کر محدود معاوضہ حاصل کرتے ہیں۔ انہوں نے زور دیا کہ یہ محنت کش بھی انسان ہیں، والد، بھائی یا خاندان کے کفیل ہو سکتے ہیں، اور ان کے ساتھ عزت و احترام کا سلوک لازمی ہے، چاہے ٹپ دی جائے یا نہ دی جائے۔

فضا علی کی اس تنقید کو سوشل میڈیا پر خوب سراہا گیا، اور صارفین نے محنت کشوں کے لیے ہمدردی اور احترام کے پیغامات جاری کیے، یاد دلاتے ہوئے کہ مشکل حالات میں کام کرنے والوں کے ساتھ شائستہ رویہ اختیار کرنا سب کی ذمہ داری ہے۔