نارنجی دروازے سے موسیقی کی دنیا تک: ٹیلر سوئفٹ کا نیا البم ریلیز

دنیا بھر میں مقبول گلوکارہ اور نغمہ نگار ٹیلر سوئفٹ نے اپنا نیا میوزیکل پروجیکٹ “دی لائف آف اے شو گرل” ریلیز کر دیا ہے، جس میں مجموعی طور پر 12 گانے شامل ہیں۔ البم کا دورانیہ تقریباً 42 منٹ ہے اور یہ موسیقی، شاعری اور کہانی کو ایک ساتھ باندھنے کی کوشش کرتا ہے۔

البم کی ریلیز کا اعلان سوئفٹ نے انسٹاگرام کے ذریعے ایک مختصر کلپ میں کیا، جس میں ایک نارنجی دروازہ دکھایا گیا، جو اس نئے تخلیقی دور کی علامت سمجھا جا رہا ہے۔

اس میوزک پروجیکٹ میں ٹیلر نے ایک بار پھر مشہور پروڈیوسرز میکس مارٹن اور شیل بیک کے ساتھ کام کیا ہے، جنہوں نے اس سے قبل بھی ان کے کئی مشہور گانے تخلیق کیے تھے۔ البم میں ہر ٹریک کو ایک الگ انداز دیا گیا ہے، لیکن تمام گانے ایک مربوط تھیم کے گرد گھومتے ہیں۔

گلوکارہ نے اس سے قبل اپنے منگیتر اور اسپورٹس اسٹار ٹریوس کیلسی کے پوڈکاسٹ میں اس البم کی تفصیلات کا انکشاف کیا تھا۔ ان کا کہنا تھا کہ یہ وہ البم ہے جو وہ ہمیشہ سے بنانا چاہتی تھیں، اور اس کا مقصد ایسے گانے پیش کرنا ہے جو سننے والوں کے دلوں میں اتر جائیں۔

البم کی ریلیز کے موقع پر ایک خصوصی تقریب کا بھی انعقاد کیا جا رہا ہے جو 3 سے 5 اکتوبر تک دنیا کے مختلف ممالک میں سینما گھروں میں دکھائی جائے گی۔ اس 89 منٹ کی تقریب میں ایک نیا میوزک ویڈیو، پردے کے پیچھے کی ویڈیوز اور ٹیلر کے خیالات شامل ہوں گے۔ اس ایونٹ کو دنیا کے 100 سے زائد ممالک میں براہ راست نشر کیا جائے گا۔