مردہ شخص اپنے ہی تعزیتی پروگرام میں پہنچ گیا

ہاٹ لائن نیوز : بھارتی ریاست گجرات میں ایک انوکھا واقعہ پیش آیا ہے۔ پوجا پاتھ ایک ایسے شخص کی روح کو مطمئن کرنے کے لیے کی گئی تھی جسے مردہ سمجھا جاتا تھا۔

لوگوں کی حیرت کی انتہا نہ رہی جب وہ شخص خود اس کی چوتھےکی رسم میں شریک ہوا۔

گجرات سے موصولہ اطلاع کے مطابق 43 سالہ برجیش سوتھر 27 اکتوبر کو احمد آباد کے نواحی علاقے نارورا سے لاپتہ ہو گئے تھے۔ اس کے گھر والوں نے اسے بہت تلاش کیا لیکن کچھ پتہ نہ چلا۔

تنگ آکر اہل خانہ نے تھانے میں گمشدگی کی رپورٹ درج کرائی۔ لاپتہ ہونے کے تقریباً دو ہفتے بعد 10 نومبر کو سابرمتی ندی کے پل کے قریب سے ایک لاش ملی تھی۔

برجیش کے اہل خانہ کو بھی شناخت کے لیے بلایا گیا تھا۔ لاش کی مماثلت کی بنیاد پر اہل خانہ نے اسے برجیش کی لاش کے طور پر قبول کیا اور آخری رسومات ادا کیں۔

اہل خانہ نے جمعہ کو ان کے لیے تعزیتی پروگرام منعقد کیا۔ برجیش نے خود آکر چوتھی کی رسم میں حصہ لیا۔ اسے اپنے درمیان پا کر سب حیران تھے۔