لندن میں انڈے پھینکنے کا واقعہ، چاہت فتح علی خان پھوٹ پھوٹ کررونےلگے

لندن میں پیش آنے والے ایک ناخوشگوار واقعے میں سوشل میڈیا پر مشہور گلوکار اور مزاحیہ شخصیت، چاہت فتح علی خان پر ایک کیفے کے باہر انڈے پھینکے گئے۔ واقعے کی ویڈیو سوشل میڈیا پر وائرل ہو گئی ہے، جس میں دیکھا جا سکتا ہے کہ گلوکار شدید جذباتی ہو گئے اور زاروقطار روتے ہوئے نظر آئے۔

چاہت فتح علی خان نے بعد ازاں ایک وضاحتی ویڈیو جاری کی جس میں انہوں نے واقعے کی تفصیلات بتاتے ہوئے کہا کہ ان پر دو افراد نے انڈے پھینکے۔ انہوں نے دعویٰ کیا کہ ایک شخص نے پہلے انڈا پھینکا، جس کے فوراً بعد ایک اور شخص نے ہاتھ میں انڈا لے کر حملہ کیا۔

گلوکار کا کہنا تھا کہ پہلے انہیں سی سی ٹی وی فوٹیج فراہم نہیں کی گئی، جس کی وجہ سے وہ فوری قانونی کارروائی نہ کر سکے۔ تاہم اب ثبوت موجود ہونے کی صورت میں وہ قانونی راستہ اپنانے کا ارادہ رکھتے ہیں اور واقعے میں ملوث افراد کے خلاف عدالت جانے کا اعلان بھی کیا ہے۔

انہوں نے متاثرہ کیفے کے مالکان کے خلاف کارروائی کی بات کرتے ہوئے کہا کہ وہ متعلقہ ریسٹورنٹ کے خلاف شکایت درج کروائیں گے۔

یہ واقعہ سوشل میڈیا پر مختلف آراء کا باعث بن رہا ہے، جہاں کچھ لوگ گلوکار کے ساتھ اظہارِ ہمدردی کر رہے ہیں جبکہ دیگر اسے انٹرنیٹ کلچر کا ایک اور مظہر قرار دے رہے ہیں۔