لاہور میں بسنت کے موقع پر 6 فروری کو مقامی تعطیل کا اعلان

لاہور میں بسنت کی تقریبات کے پیش نظر پنجاب حکومت نے 6 فروری کو مقامی تعطیل کا اعلان کیا ہے۔ یہ فیصلہ ضلعی انتظامیہ کی سفارشات کی بنیاد پر کیا گیا تاکہ شہری جشن میں بلا رکاوٹ حصہ لے سکیں۔
ذرائع کے مطابق، ابتدائی طور پر ضلعی انتظامیہ نے 5 فروری کو تعطیل رکھنے کی تجویز دی تھی، جس پر غور کرنے کے بعد حکومت نے 6 فروری کو چھٹی کی منظوری دی۔
ڈی سی لاہور نے والدین کو ہدایت کی ہے کہ 18 سال سے کم عمر بچے بھی اہلخانہ کے ساتھ بسنت میں شامل ہوں تاکہ جشن میں حفاظت اور نظم و ضبط برقرار رہے۔ انہوں نے مزید کہا کہ متعلقہ حکام اس بات کو یقینی بنائیں گے کہ شہری امن و امان کے ساتھ تقریبات میں حصہ لے سکیں۔
پولیس نے شہر کو ریڈ، یلو اور گرین زون میں تقسیم کیا ہے۔ ریڈ زون میں حساس اور زیادہ گنجان آباد علاقے شامل ہیں جہاں سخت حفاظتی اقدامات نافذ ہوں گے، جبکہ یلو اور گرین زون میں نسبتاً کم خطرناک اور محفوظ علاقے شامل ہیں۔
بسنت کے دوران نگرانی کے لیے جدید ٹیکنالوجی استعمال کی جائے گی، جس میں ڈرون کیمرے، سوشل میڈیا مانیٹرنگ اور کنٹرول رومز شامل ہیں۔ پولیس نے کہا ہے کہ چھتوں پر شراب نوشی، ہوائی فائرنگ اور دیگر غیر قانونی سرگرمیوں میں ملوث افراد کے خلاف فوری کارروائی کی جائے گی۔