فائٹ فائٹ فائٹ” کے نعرے کے ساتھ ٹرمپ کی تصویر، امریکی سکے کانیاڈیزائن سامنےآگیا

امریکی محکمہ خزانہ کی جانب سے امریکا کی 250ویں سالگرہ کے موقع پر جاری کیے جانے والے یادگاری ایک ڈالر کے سکے کے ابتدائی ڈیزائنز سامنے آئے ہیں، جن میں سابق صدر ڈونلڈ ٹرمپ کی تصاویر شامل ہیں۔

محکمہ خزانہ کے اہلکار برینڈن بیچ نے سوشل میڈیا پلیٹ فارم “ایکس” پر جاری کردہ بیانات میں ان ڈیزائنز کی تصدیق کرتے ہوئے کہا کہ یہ ابتدائی خاکے حقیقی ہیں اور یہ امریکا کی آزادی کی ڈھائی سو سالہ تقریبات اور موجودہ یا سابق صدر کو خراج تحسین پیش کرنے کی ایک کوشش ہیں۔ ان کا کہنا تھا کہ مزید تفصیلات اس وقت جاری کی جائیں گی جب حکومتی نظام مکمل طور پر فعال ہو جائے گا۔

سکے کے ممکنہ ڈیزائنز میں اگلے رخ پر سابق صدر ٹرمپ کا سائیڈ پروفائل موجود ہے، جس کے ساتھ ’لبرٹی‘، ’اِن گوڈ وی ٹرسٹ‘، اور 1776–2026 کے نشانات کندہ کیے گئے ہیں۔ سکے کے پچھلے حصے پر پنسلوانیا کے شہر بٹلر میں قاتلانہ حملے کے بعد ٹرمپ کی مکا لہراتی تصویر دکھائی گئی ہے، جس کے پس منظر میں امریکی پرچم لہرا رہا ہے اور اوپر فائٹ فائٹ فائٹ کے الفاظ درج ہیں۔

تاہم، ان ڈیزائنز پر قانونی اعتراضات اٹھائے جا رہے ہیں۔ امریکی قانون کے مطابق کسی زندہ شخص — خواہ موجودہ ہو یا سابق صدر — کی تصویر سکے پر شامل کرنا ممنوع ہے۔ اسی طرح، کسی مرحوم صدر کی تصویر بھی دو سال بعد تک شامل نہیں کی جا سکتی۔ علاوہ ازیں، قانون یہ بھی کہتا ہے کہ سکے کے پچھلے حصے پر کسی شخص کی ہیڈ اینڈ شولڈر تصویر یا مجسمہ نہیں دکھایا جا سکتا۔

مبصرین کا خیال ہے کہ سائیڈ پروفائل اور مکمل جسمانی تصویر کو شامل کر کے قانونی پابندیوں سے بچنے کی کوشش کی گئی ہے، لیکن اس کی حیثیت ابھی غیر واضح ہے۔

محکمہ خزانہ نے واضح کیا ہے کہ یہ محض ابتدائی خاکے ہیں اور یادگاری سکے کا حتمی ڈیزائن تاحال منظور نہیں کیا گیا۔ تاہم، حکام کا کہنا ہے کہ یہ ڈیزائن امریکا کے جذبے اور جمہوریت کی مضبوطی کی نمائندگی کرتے ہیں۔

وائٹ ہاؤس سے جب سوال کیا گیا کہ کیا سابق صدر ٹرمپ نے یہ ڈیزائن دیکھے ہیں، تو ترجمان نے کہا کہ انہیں معلوم نہیں کہ ٹرمپ نے یہ دیکھے ہیں یا نہیں، لیکن غالب امکان ہے کہ وہ ان خاکوں کو پسند کریں گے۔