فائرنگ کے الزام میں گرفتار کمال راشد خان، تحقیقات جاری

ممبئی پولیس نے معروف بولی ووڈ اداکار اور فلمی ناقد کمال راشد خان، جنہیں ’کے آر کے‘ کے نام سے بھی جانا جاتا ہے، کو گرفتار کر لیا ہے۔
پولیس کے مطابق، کمال راشد خان پر اندھیری کے اوشیواڑہ علاقے میں ایک رہائشی عمارت پر فائرنگ کرنے کا الزام ہے۔ ابتدائی تفتیش میں ان کے چار راؤنڈ فائر کرنے کی تصدیق ہوئی، جن میں سے ایک گولی اس عمارت سے ٹکرائی جہاں مشہور رائٹر اور ڈائریکٹر نیرج کمار مشرا رہائش پذیر ہیں۔
کمال راشد خان کو جمعہ کی رات ان کے اسٹوڈیو سے حراست میں لیا گیا اور ابتدائی پوچھ گچھ کے بعد انہیں باضابطہ گرفتار کر لیا گیا۔ تفتیش کے دوران انہوں نے اعتراف کیا کہ 18 جنوری کو فائرنگ انہی کی جانب سے کی گئی تھی۔ پولیس نے اس واقعے میں استعمال ہونے والا اسلحہ بھی برآمد کر لیا ہے۔
اداکار کا کہنا ہے کہ ان کا کسی کو نقصان پہنچانے کا ارادہ نہیں تھا اور وہ صرف اپنے لائسنس یافتہ ہتھیار کی صفائی اور جانچ کر رہے تھے۔ ان کے مطابق، وہ گولی مینگرووز کی جانب چلانے کا ارادہ رکھتے تھے، مگر تیز ہوا کی وجہ سے ایک گولی غلط سمت میں جا کر رہائشی عمارت سے ٹکرائی۔
پولیس کے مطابق عمارت کی دوسری منزل پر نیرج کمار مشرا جبکہ چوتھی منزل پر ماڈل پرتیک بیدی رہائش پذیر ہیں۔ ابتدائی طور پر فائرنگ کرنے والے کی شناخت ممکن نہیں تھی، لیکن بعد ازاں تحقیقات میں کمال راشد خان کا نام سامنے آیا۔
یہ پہلا موقع نہیں کہ کمال راشد خان قانونی مشکلات میں ملوث ہوں۔ سابقہ برسوں میں وہ سوشل میڈیا پر متنازع بیانات اور بولی ووڈ شخصیات پر تنقید کی وجہ سے خبروں میں رہ چکے ہیں۔ 2022 میں انہیں ممبئی ایئرپورٹ سے حراست میں لیا گیا تھا، جبکہ 2020 میں اداکار عرفان خان اور رشی کپور سے متعلق ٹوئٹس کے سبب بھی انہیں قانونی کارروائی کا سامنا کرنا پڑا تھا۔