غزہ میں جنگ بندی کے باوجود اسرائیلی حملے جاری، درجنوں افراد شہید اور زخمی

غزہ میں جنگ بندی کے اعلان کے باوجود اسرائیلی حملے رک نہیں سکے اور تازہ حملوں میں کم از کم 24 فلسطینی شہری شہید اور 83 زخمی ہو گئے ہیں۔ بین الاقوامی خبر رساں ادارے کے مطابق ملبے تلے مزید افراد دبے ہونے کے باعث ہلاکتوں میں اضافے کا خدشہ ہے۔

غزہ کی وزارتِ صحت کا کہنا ہے کہ 10 اکتوبر کو اسرائیل اور حماس کے درمیان جنگ بندی کے معاہدے کے نفاذ کے بعد سے اب تک کم از کم 340 فلسطینی شہید اور 871 زخمی ہو چکے ہیں۔ حکام نے بتایا کہ مسلسل حملوں کی وجہ سے طبی سہولتوں پر دباؤ بڑھ رہا ہے اور شہید اور زخمی ہونے والوں میں خواتین اور بچوں کی تعداد زیادہ ہے۔

حماس کے ترجمان محمود بسال نے کہا کہ تازہ حملوں میں حماس کے مسلح ونگ القسام بریگیڈ کا ایک کمانڈر بھی شہید ہوا ہے اور اسرائیلی کارروائیاں جنگ بندی معاہدے کی صریح خلاف ورزی ہیں، جن کے سنگین نتائج سامنے آ سکتے ہیں۔

علاقے میں امدادی سرگرمیاں بھی شدید متاثر ہو رہی ہیں اور فلسطینی عوام خراب ہوتی ہوئی صورتحال کے باعث شدید مشکلات کا سامنا کر رہے ہیں۔