غزہ سے اسرائیلی مغویوں کی واپسی مکمل، آخری لاش اہل خانہ کے حوالے

اسرائیلی فوج نے پیر کو اعلان کیا کہ غزہ میں موجود آخری اسرائیلی لاش کی شناخت مکمل کر لی گئی ہے اور تمام ہلاک شدہ اہلکاروں اور قیدیوں کی واپسی کا عمل ختم ہو گیا ہے۔ فوج نے ہلاک شدہ اہلکار ران گویلی کی لاش ان کے اہل خانہ کے حوالے کر دی ہے۔
اسرائیلی فوج کی ترجمان کے مطابق، نیشنل سینٹر فار فارنزک میڈیسن کے ذریعے شناخت کے تمام مراحل مکمل ہونے کے بعد ران گویلی کی لاش واپس دی گئی۔ اس کے ساتھ ہی غزہ میں موجود تمام اسرائیلی مغویوں کی واپسی بھی مکمل ہو گئی ہے۔
ران گویلی اسرائیلی پولیس کی خصوصی یونٹ ’سام‘ کا 24 سالہ اہلکار تھا، جو سات اکتوبر 2023 کو ہلاک ہوا تھا۔ اسرائیلی فوج کے مطابق، اس کی لاش کو غزہ منتقل کیا گیا تھا۔
یہ پہلا موقع ہے کہ 2014 کے بعد غزہ میں کوئی اسرائیلی قیدی یا لاش موجود نہیں رہی۔ اسرائیلی وزیر اعظم نے اس موقع پر کہا کہ یہ عمل فوج، ریاست اور شہریوں کے لیے ایک اہم کامیابی ہے۔
حماس نے بھی اعلان کیا ہے کہ تبادلے کا مرحلہ مکمل ہو چکا ہے اور وہ غزہ کی انتظامی کمیٹی کی کارروائیوں میں سہولت فراہم کرنے کے لیے اپنی وابستگی برقرار رکھے گی۔
یہ پیش رفت اس اعلان کے ایک دن بعد سامنے آئی، جب اسرائیلی فوج نے شمالی غزہ میں ایک قبرستان میں کارروائی کر کے باقیات تلاش کیں۔ باقی ماندہ یرغمالیوں کی واپسی کو رفح کراسنگ دوبارہ کھولنے کی راہ میں آخری رکاوٹ کے خاتمے کے طور پر دیکھا جا رہا ہے، جو جنگ بندی کے اگلے مرحلے کے آغاز کا عندیہ ہے۔
اسرائیل اور حماس کے درمیان جاری جنگ بندی کے پہلے مرحلے کے تحت 10 اکتوبر 2025 کو 20 زندہ یرغمالیوں کی واپسی اور 28 ہلاک شدہ یرغمالیوں کی لاشیں اسرائیل کو منتقل کی گئی تھیں۔