عمران خان نے فائنل مارچ کی کال دے دی

ہاٹ لائن نیوز : تحریک انصاف کے بانی عمران خان نے 24 نومبر کو اسلام آباد مارچ کی کال دے دی۔

اڈیالہ جیل کے باہر میڈیا سے بات کرتے ہوئے عمران خان کے وکیل فیصل چوہدری نے کہا کہ بانی پی ٹی آئی نے اسلام آباد مارچ کے لیے کمیٹی بنا دی ہے تاہم انہوں نے کمیٹی کے نام بتانے سے انکار کردیا۔ انہوں نے کہا کہ میں نام نہیں بتاؤں گا کیونکہ پھر وہ گرفتار ہوجائیں گے۔

انہوں نے کہا کہ عمران خان نے کہا ہے کہ 24 نومبر کو احتجاج کا مرکز اسلام آباد ہو گا، پورے پاکستان اور دنیا بھر میں احتجاج کیا جائے گا، مطالبات کی منظوری تک احتجاج ختم نہیں ہوگا۔

فیصل چوہدری کے مطابق بانی پی ٹی آئی نے کہا کہ یہ احتجاج کی آخری کال ہے، ہم مطالبہ کرتے ہیں کہ 26ویں ترمیم واپس لی جائے اور ہمارا مینڈیٹ واپس کیا جائے، بغیر ٹرائل کے گرفتار افراد کو رہا کیا جائے۔

دوسری جانب عمران خان کی بہن علیمہ خان نے کہا کہ بانی پی ٹی آئی نے حتمی کال دے دی ہے اور ہر کارکن کو مخاطب کرکے کہا ہے کہ انہیں پورے پاکستان سے نکلنا ہے۔