شمالی کوریا نے نئے ہائپر سونک میزائل کا کامیاب تجربہ کردیا

پیانگ یانگ: شمالی کوریا نے اتوار کو دعویٰ کیا ہے کہ اس نے ایک نئے ہائپر سونک میزائل کا کامیاب تجربہ کیا ہے، جس کے بعد خطے میں سکیورٹی کے خدشات بڑھ گئے ہیں۔ حکام کے مطابق یہ اقدام ملکی دفاعی صلاحیت کو مضبوط بنانے اور موجودہ عالمی حالات کے پیش نظر کیا گیا ہے۔
سرکاری خبر رساں ادارے کے مطابق یہ شمالی کوریا کا اس سال کا پہلا بیلسٹک میزائل تجربہ تھا۔ اس موقع پر رہنما کم جونگ اُن نے زور دیا کہ ملک کو ایک مضبوط اور قابلِ اعتماد جوہری دفاعی نظام کی ضرورت ہے اور اسے مزید مؤثر بنایا جانا چاہیے۔
کم جونگ اُن نے کہا کہ یہ تجربہ شمالی کوریا کی جوہری افواج کی تیاری اور جنگی آمادگی کی صلاحیت کو ظاہر کرتا ہے۔ ان کے مطابق حالیہ عرصے میں ملک کی جوہری صلاحیتوں کو عملی طور پر مضبوط بنانے میں اہم پیش رفت ہوئی ہے۔
انہوں نے مزید کہا کہ یہ سرگرمیاں جوہری دفاعی نظام کو اعلیٰ سطح تک پہنچانے کے لیے ضروری ہیں اور موجودہ عالمی اور جغرافیائی سیاسی صورتحال اس کی ضرورت کی مثال ہیں۔
واضح رہے کہ شمالی کوریا نے ہائپر سونک میزائلوں کا پہلا تجربہ گزشتہ سال اکتوبر میں کیا تھا۔ یہ میزائل آواز کی رفتار سے پانچ گنا زیادہ تیز پرواز کر سکتے ہیں اور دورانِ پرواز اپنا راستہ بدلنے کی صلاحیت رکھتے ہیں۔