شادی کی تقریب ماتم میں بدل گئی، دھماکے میں قیمتی جانیں ضائع

خیبرپختونخوا کے ضلع ڈیرہ اسماعیل خان میں قریشی موڑ کے قریب ایک گھر میں ہونے والے دھماکے کے نتیجے میں پانچ افراد جاں بحق جبکہ متعدد زخمی ہو گئے۔
پولیس کے مطابق دھماکا جمعے کے روز شادی کی تقریب کے دوران ہوا، جس کے باعث تقریب میں موجود افراد میں شدید خوف و ہراس پھیل گیا۔ دھماکے کے فوراً بعد ریسکیو ٹیموں اور قانون نافذ کرنے والے اداروں نے موقع پر پہنچ کر امدادی کارروائیاں شروع کیں۔
ریسکیو ذرائع کا کہنا ہے کہ زخمیوں کو قریبی اسپتال منتقل کر دیا گیا ہے، جہاں بعض افراد کی حالت تشویشناک بتائی جا رہی ہے۔
ابتدائی معلومات کے مطابق دھماکے کی نوعیت کا تعین کیا جا رہا ہے، تاہم پولیس اور دیگر ادارے تمام پہلوؤں سے تحقیقات کر رہے ہیں۔ واقعے کے بعد علاقے کو گھیرے میں لیکرشواہد اکٹھے کیے جا رہے ہیں۔
حکام کا کہنا ہے کہ تحقیقات مکمل ہونے کے بعد واقعے کی اصل وجوہات سے آگاہ کیا جائے گا۔