سیلاب کے باعث حج رجسٹریشن کی مدت میں توسیع

وزارت مذہبی امور نے حالیہ سیلاب کے پیش نظر نجی حج اسکیم کے تحت عازمین کی رجسٹریشن کی مدت میں توسیع کر دی ہے۔ اس سے قبل رجسٹریشن کی آخری تاریخ 8 ستمبر مقرر کی گئی تھی۔

وزارت کے مطابق اب تک 21 ہزار افراد حج کے لیے رجسٹریشن کرا چکے ہیں۔ نجی حج اسکیم کے کوٹے میں اُن افراد کو ترجیح دی جائے گی جو گزشتہ سال کسی وجہ سے حج پر نہ جا سکے تھے۔

نجی حج آپریٹرز کو ہدایت دی گئی ہے کہ وہ باقی ماندہ کوٹے پر نئی درخواستیں وصول کر سکتے ہیں۔ ایسے عازمین جنہوں نے گزشتہ سال اپنی رقم جمع کرائی تھی، وہ بغیر کسی اضافی اخراجات کے حج ادا کر سکیں گے، اور آپریٹرز اس بات کے پابند ہوں گے کہ ان سے اضافی رقم نہ لی جائے۔

البتہ، وہ افراد جنہوں نے پچھلے سال اپنی رقم واپس لے لی تھی، اب گزشتہ سال کے پیکج پر حج کرنے کے اہل نہیں ہوں گے۔