سپریم کورٹ نے افغان شہریوں کو پاکستانی شہریت دینے کا پشاور ہائیکورٹ کا فیصلہ معطل کردیا

اسلام آباد: سپریم کورٹ آف پاکستان نے پشاور ہائیکورٹ کے اُس فیصلے کو معطل کردیا ہے جس میں پاکستانی خواتین سے شادی کرنے والے افغان شہریوں کو پاکستانی شہریت دینے کا حکم دیا گیا تھا۔

جسٹس شاہد وحید کی سربراہی میں تین رکنی بینچ نے کیس کی سماعت کی۔ سماعت کے دوران ایڈیشنل اٹارنی جنرل رانا اسد اللہ نے عدالت کو بتایا کہ وفاقی حکومت نے یکم دسمبر 2023 کے پشاور ہائیکورٹ کے فیصلے کے خلاف اپیل دائر کر رکھی ہے۔ ہائیکورٹ کے فیصلے کے مطابق، اگر کوئی افغان شہری پاکستانی خاتون سے شادی کرے تو اسے پاکستانی اوریجن کارڈ اور شہریت دی جا سکتی ہے۔

عدالت نے استفسار کیا کہ اس فیصلے کے تحت کتنے افراد درخواست گزار ہیں، جس پر ایڈیشنل اٹارنی جنرل نے بتایا کہ اب تک 117 درخواستیں موصول ہوچکی ہیں۔ جسٹس مسرت ہلالی نے ریمارکس دیے کہ “یہ تو صرف وہ افراد ہیں جو سامنے آئے ہیں، تعداد اس سے زیادہ بھی ہوسکتی ہے۔”

نادرا کے وکیل نے عدالت کو بتایا کہ پاکستانی خواتین سے شادی کرنے والے افغان شہریوں کے لیے قانونی طور پر ویلیڈ ویزا کا ہونا لازمی ہے۔ اس پر عدالت نے مشاہدہ کیا کہ یہ دیکھنا ضروری ہے کہ کوئی شخص قانونی طریقے سے ملک میں داخل ہوا یا غیر قانونی طور پر۔

سپریم کورٹ نے پشاور ہائیکورٹ کا فیصلہ عبوری طور پر معطل کرتے ہوئے تمام فریقین کو نوٹس جاری کردیا اور کیس کی مزید سماعت ملتوی کردی۔