سندھ حکومت کا نیا واٹر لا متعارف کرانے کا فیصلہ

کراچی: سندھ حکومت نے صوبے میں پانی کے بہتر انتظام، منصفانہ تقسیم اور ماحولیاتی تحفظ کے لیے نیا سندھ واٹر لا متعارف کرانے کی تیاری شروع کردی ہے۔

اس حوالے سے صوبائی وزیر آبپاشی جام خان شورو اور سیکرٹری آبپاشی ظریف اقبال کھیڑو کی زیر صدارت اجلاس ہوا، جس میں ورلڈ بینک کے وفد، پراجیکٹ ڈائریکٹر نذیر میمن اور متعلقہ افسران نے شرکت کی۔

اجلاس میں سواٹ منصوبے اور نئے سندھ واٹر قانون کی تیاری سے متعلق پیش رفت کا جائزہ لیا گیا۔ ترجمان کے مطابق محکمہ آبپاشی اور سیڈا کے افسران پر مشتمل کمیٹی آئندہ ماہ تک قانونی مسودہ تیار کر کے وزارت آبپاشی سندھ کو پیش کرے گی۔

وزیر آبپاشی جام خان شورو نے کہا کہ مجوزہ سندھ واٹر لا کو کابینہ اور سندھ اسمبلی سے منظوری کے بعد نافذ کیا جائے گا۔ ان کے مطابق یہ قانون صوبے میں پانی کے منصفانہ استعمال، مؤثر انتظام اور ماحول دوست پالیسیوں کے فروغ کے لیے ایک اہم قدم ثابت ہوگا۔